Ötən sutka Çində qeydə alınan COVID-19 yoluxmalarının hamısı xarici mənşəli olub
Pekin, 30 aprel, AZƏRTAC
Çində ötən sutka yeni növ koronavirusa (COVID-19) 4 yoluxma halı qeydə alınıb ki, onların da hamısı xarici mənşəli yoluxmadır.
AZƏRTAC xəbər verir ki, bu barədə Çinin Səhiyyə Məsələləri üzrə Dövlət Komitəsi açıqlama yayıb. Ötən sutka qeydə alınan 3 şübhəli yoluxma da xarici mənşəlidir.
Bildirilir ki, ötən sutka Çində COVID-19 infeksiyasından ölüm baş verməyib, müalicəsi başa çatan 32 pasiyent xəstəxananı tərk edib. Hazırda Çində 619 aktiv COVID-19 xəstəsi var ki, onların da 41-nin vəziyyəti ağırdır.
Qeyd edək ki, dekabrın son günlərində Hubey vilayətinin inzibati mərkəzi olan Uxan şəhərində aşkarlanan yeni növ koronavirusa Çinin materik hissəsində indiyədək 82 min 862 nəfər yoluxub, 4633 nəfər ölüb, 77 min 610 nəfər sağalıb. Yoluxma hallarının 1664-ü xarici mənşəli olub.
Çinin Honkonq xüsusi inzibati bölgəsində indiyədək 1037 yoluxma və 4 ölüm, Makao xüsusi inzibati bölgəsində 45 yoluxma, Tayvan adasında isə 429 yoluxma və 6 ölüm baş verib.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
