PAVLODARDA SƏMƏD VURĞUNUN 100 İLLİYİ QEYD OLUNMUŞDUR

28.04.2006 [14:52]
Çap et
A⁺ A^-

AZƏRTAC-ın xüsusi müxbiri xəbər verir ki, Qazaxıstanın Pavlodar vilayətindəki “Vətən” Azərbaycan Mədəniyyət Mərkəzi və şəhər mərkəzi kitabxanası böyük Azərbaycan şairi Səməd Vurğunun 100 illik yubileyinə həsr olunmuş mərasim keçirmişdir.

Tədbirdə diasporumuzun üzvləri, Azərbaycan məktəbinin şagirdləri, Pavlodar Dövlət Universiteti türkologiya bölməsinin müəllim və tələbələri iştirak etmişlər.

Mərasimi Azərbaycan Mədəniyyət Mərkəzi sədrinin müavini Rəsul Ələkbərov açaraq, Səməd Vurğunun Azərbaycan ədəbiyyatının və mədəniyyətinin inkişafındakı tarixi xidmətlərindən danışmışdır.

Pavlodardakı Azərbaycan məktəbinin müəllimi Elmira Zeynalova, beynəlmiləl məktəbin direktoru Şamal Baymanova, şair Vəzir Ramazanov və başqaları çıxış edərək, şairin ədəbi irsindən danışmış, qəlb oxşayan şeirlərini yada salmışlar.

Şagirdlər şairin məşhur “Azərbaycan” şeirini Azərbaycan, rus və qazax dillərində oxumuş, digər şeirlərini söyləmişlər.

Mərasimdə Səməd Vurğunun şeirlərinə bəstələnmiş mahnılar səslənmişdir.