PAYTAXT BƏLƏDİYYƏLƏRİNİN MİNİ FUTBOL ÜZRƏ SPARTAKİADASI BAŞLAMIŞDIR
AZƏRTAC xəbər verir ki, sentyabrın 10-da Binəqədi rayonunun İdman-Sağlamlıq Kompleksində paytaxtın rayon, qəsəbə və kənd bələdiyyələri arasında mini futbol üzrə I spartakiadanın açılış mərasimi olmuşdur.
Mərasim iştirakçıları qarşısında çıxış edən Bakı Şəhər Gənclər və İdman Baş İdarəsinin rəisi Raqif Abbasov futbolun bir idman növü kimi ölkəmizdə çox sevildiyini bildirmiş, son illər bu sahəyə də dövlət səviyyəsində xüsusi diqqət göstərildiyini vurğulamışdır.
R.Abbasov hazırda Pekində davam edən Yay Paralimpiya Oyunlarında Azərbaycan idmançılarının yüksək nailiyyətlər əldə etməsinin də ölkəmizdə idmanın inkişafı ilə sıx bağlı olduğunu qeyd etmişdir.
İdmanın populyarlığına xidmət edən belə yarışların gələcəkdə də keçiriləcəyini deyən R.Abbasov turnir iştirakçılarına uğurlar diləmişdir.
Spartakiadanın mükafatları uğrunda Binəqədi, Nizami, Sabunçu, Xətai, Biləcəri və Nərimanov bələdiyyələrinin futbol komandaları mübarizə aparırlar.
Bölmənin digər xəbərləri
