PAYTAXT POLİSİ DOQQUZ AYDA GÖRÜLƏN İŞLƏRƏ YEKUN VURMUŞDUR
BŞBPİ-nin rəisi, polis general-leytenantı Məhərrəm Əliyevin verdiyi məlumata görə, 9 ay ərzində şəhərdə cinayət xətti üzrə qeydə alınmış ümumi cinayətlərin 95,2 faizi, ağır cinayətlərin isə 90,8 faizi açılmışdır.
Ağır cinayət hadisələrinə, qəsdən adamöldürmə, adam oğurluğu, quldurluq, soyğunçuluq, ev oğurluğu və sairə cinayətlərə, onların açılmasına münasibətini bildirən polis general-leytenantı Məhərrəm Əliyev vurğulamışdır ki, ötən müddət ərzində paytaxtda kriminogen durum daim nəzarətdə saxlanılmış, sabitlik qorunmuş, qanunsuz kütləvi aksiyaların keçirilməsinə, təxribat hadisələrinin törədilməsinə imkan verməmiş, ictimai asayişin mühafizəsi təmin edilmişdir.
BŞBPİ-nin rəisi Məhərrəm Əliyev müsbət işlərlə yanaşı, əsasən yol verilmiş nöqsanlar üzərində də dayanmış, bir neçə qəsdən adamöldürmə üzrə bir neçə cinayətin bağlı qalması, əvvəllər ağır cinayətlər törətmiş şəxslərin tutulması ilə əlaqədar xidmət rəisləri və rayon polis idarələrinin rəhbərlərinə ciddi iradlarını bildirmiş, təxirəsalınmaz əməliyyat-axtarış tədibrlərinin həyata keçirilməsini tələb etmişdir. O, bir sıra problem məsələlərə də toxunaraq, buraxılmış səhvlərin aradan qaldırılması, xüsusilə ağır cinayətlərə, o cümlədən adam oğurluğuna qarşı daha ciddi mübarizə aparılmasını nəzərə çatdırmış, terror aktları barədə məlumatların təxirə salınmadan yoxlanılmasını, bayır xidməti əməkdaşları tərəfindən vətəndaşlara qarşı kobudluğa və nəzakətsizliyə yol verilməməsini, ərizələrə və şikayətlərə baxılarkən vətəndaşların hüquqlarının qorunmasını orqan rəislərindən tələb etmiş, hər bir xidmət sahəsinin qarşısında konkret vəzifələr qoymuşdur.
Şəxsi heyət arasında sağlam münasibətlərin zəruriliyini qeyd edən Məhərrəm Əliyev vurğulamışdır ki, sürücülərin yol nişanlarının tələblərini pozması, avtomobilləri səkilərdə saxlamaları, avtoxuliqanlıq etmələri, surət həddini aşmaları ciddi narahatlıq doğurur. Təəssüflər olsun ki, yol polisinin əməkdaşları belə sürücülərə qarşı laqeyidlik göstərir, sahə inspektorları günün tələbləri səviyyəsində işləmirlər.
Müşavirədə BŞBPİ-nin rəis müavini, polis polkovniki Cavadağa Sultanov məruzəsində Bakı Şəhər Polis Qarnizonunun cari ilin 9 ayında görülən işləri ətraflı təhlil olunmuş, müsbət qiymətləndirilmişdir.
Məruzə ətrafında BŞBPİ-nin müxtəlif strukturlarının rəhbərləri, paytaxt rayonların polis rəisləri çıxış etmiş, tabeçiliklərində olan əməkdaşlar tərəfindən 2004-cü ilin qalan dövrü ərzində cinayətkarlığa qarşı mübarizənin daha yüksək səviyyədə təşkil olunacağına söz vermişlər.
Sonda Məhərrəm Əliyev müşavirəyə yekun vuraraq, respublika Prezidenti İlham Əliyevi, Daxili İşlər Nazirliyinin rəhbərliyini BŞBPİ-nin əməkdaşları adından əmin etmişdir ki, polis əməkdaşları işlərini uğurla davam etdirəcək, səylərini səfərbərliyə alaraq onların qarşısında qoyulan vəzifələrin həlli üçün bütün bilik və bacarığını əsirgəməyəcək, cinayətkarlığa qarşı mübarizədə tam məsuliyyət hissi ilə çalışacaq, əvvəlki illər kimi, 2004-cü ili də yüksək göstəricilərlə başa vuracaqlar.
