Peruda asayişin qorunmasına hərbçilər cəlb olunacaq
Bakı, 27 sentyabr, AZƏRTAC
Peru hökuməti ölkədə tüğyan edən cinayətkarlıqla bağlı paytaxt Limanın 11 rayonunda fövqəladə vəziyyət elan etmək və hərbçiləri asayişin qorunmasına cəlb etmək qərarına gəlib.
AZƏRTAC xəbər verir ki, bunu ölkənin müdafiə naziri Volter Astudilo mətbuat konfransında bildirib. Nazirin sözlərinə görə, Peru polisi asayişi silahlı qüvvələrin dəstəyi ilə təmin edəcək.
Hökumət parlamentə “şəhər terrorizmi” haqqında qanun layihəsi göndərəcək. Buraya muzdlu qətllər, insan oğurluğu, qəsb və qeyri-qanuni yolla silah əldə olunması ilə mübarizə tədbirləri daxildir. Bundan əlavə, hakimiyyət ölkənin cənubunda yerləşən ciddi rejimli cəzaçəkmə müəssisəsini genişləndirməyi və ağır cinayətlərə görə məhkum olunanları ora göndərməyi qərara alıb.
Sentyabrın 26-da paytaxtın ictimai nəqliyyat işçiləri hücum və qətl hallarının artması fonunda tətil keçirərək, müdafiələrinin təmin olunmasını tələb ediblər. Təkcə son bir ay ərzində ən azı 15 avtobus sürücüsünə hücum faktı qeydə alınıb, üç sürücü öldürülüb.
Bölmənin digər xəbərləri
