Polina Beryozina: İstərdim ki, İspaniyada da Bakıdakı kimi gimnastika mərkəzi olsun
Bakı, 16 fevral, AZƏRTAC
Bakıda təlim-məşq toplanışında olan bədii gimnastika üzrə İspaniya yığma komandasının üzvü Polina Beryozina Azərbaycan Gimnastika Federasiyasının mətbuat xidmətinə müsahibə verib.
AZƏRTAC Azərbaycan Gimnastika Federasiyasına istinadla müsahibəni təqdim edir:
- Azərbaycana xoş gəlmisiniz. Təlim-məşq toplanışınız barədə məlumat verərdiniz.
Azərbaycana məşqçim və digər gənc gimnastla birgə gəlmişik. Bakıya səfərimizin məqsədi təcrübə toplamaq, peşəkarlarla işləmək, Azərbaycanın ən yaxşı gimnastlarından öyrənməkdir. Burada məşq etmək mənim çox xoşuma gəlir. Artıq bir neçə gündür ki, məşq edirəm. Kifayət qədər yeni təcrübə əldə etmişəm. Ümid edirəm ki, bu təcrübə idmanda, həyatda və məqsədlərimə çatmaqda mənə çox kömək edəcək.
- Bu sizin Azərbaycana ilk səfərinizdir?
Bu, mənim Bakıya ilk səfərim deyil. Paytaxtınızda mütəmadi olaraq dünya kuboku yarışları keçirilir və son 3-4 ildə demək olar ki, hamısında iştirak etmişəm.
- Buradakı şəraiti necə dəyərləndirirsiniz?
Şərait, sadəcə, qüsursuzdur. Çoxlu gimnastlar birlikdə təcrübələrini paylaşırlar. Kifayət qədər məşq xalçaları var. Peşəkar xoreoqraflar, fizioterapevtlər - hamı burada böyük bir komanda kimi çalışır. Onlar elə gözəl şəraitdə işləyirlər ki, demək olar ki, heç nə əskik olmur. İstərdim ki, İspaniyada da belə bir gimnastika mərkəzi olsun.
- Pandemiya dövründə yarışlara hazırlığınızı necə dəyərləndirirsiniz?
2020-ci ildə koronavirus pandemiyası ilə əlaqədar hər yer bağlı olduğu üçün 3 ay evdə qalmalı olduq. Məşq etmək çox çətin idi, şərtlər demək olar ki, dözülməz idi. Amma qarşıda məni Olimpiya Oyunlarına seçmə yarışlar gözləyirdi. Buna görə də məşqləri davam etdirmək, bu vəziyyətdən çıxmaq üçün özümdə güc tapdım. Karantindən çıxan kimi işlər sürətlə getməyə başladı. Çünki istəklərim və planlarım var idi. Həqiqətən, deyə bilərəm ki, bu 3 ay bizə düşünmək üçün vaxt verdi. Biz arzu və məqsədlərimiz barədə fikirləşmək imkanı qazandıq. Həqiqətən idmanla məşğul olmaq istəyirik, yoxsa yox?
- Qarşıdakı planlarınız nədən ibarətdir?
İndi mənim gələcəklə bağlı əsas planlarım qarşıdakı yarışlara ciddi hazırlaşmaqdır. Parisdə təşkil olunacaq Yay Olimpiya Oyunlarına gələn il seçmə yarışlar keçiriləcək. Çox istərdim ki, İspaniya üçün lisenziya qazanım.
Bölmənin digər xəbərləri
