POLİS AKADEMİYASINDA GÖRÜŞ
AZƏRTAC xəbər verir ki, sentyabrın 25-də Daxili İşlər Nazirliyinin Polis Akademiyasında bu təhsil ocağının XXIX Pekin Yay Olimpiya Oyunlarında iştirak etmiş əməkdaşları, eləcə də Azərbaycan Prezidentinin təqaüdçüsü və əlaçı müdavimlərlə görüş keçirilmişdir.
Akademiyanın rəisi, general-mayor Ramiz Nağıyev XXIX Pekin Yay Olimpiya Oyunlarında respublikamızın və təhsil ocağının adını uca tutmuş cüdo üzrə yığma komandanın üzvü, olimpiadanın bürünc mükafatçısı, fiziki hazırlıq kafedrasının baş müəllimi, polis baş leytenantı Mövlud Mirəliyevi və güləş üzrə hakim briqadasının üzvü, həmin kafedranın idman-sağlamlıq kompleksinin rəisi, polis mayoru Hicran Şərifovu, habelə Azərbaycan Prezidentinin təqaüdünə layiq görülmüş I kurs müdavimi Zaur Abdullayevi və əlaçı müdavimləri qazandıqları naliyyətlərə görə təbrik etmişdir.
R.Nağıyev Azərbaycanda təhsilə və idmana göstərilən dövlət qayğısından danışmışdır. Vurğulamışdır ki, son illərdə dövlət səviyyəsində göstərilən qayğının sayəsində Azərbaycanda idman sürətlə inkişaf edir. İdmançılarımızın Olimpiya oyunlarında, dünya və Avropa çempionatlarında, beynəlxalq yarışlarda qazandıqları qələbələr bunun nəticəsidir.
Sonra Pekin Yay Olimpiya Oyunlarında iştirak etmiş əməkdaşlara, Azərbaycan Prezidentinin təqaüdçüsünə və əlaçı müdavimlərə hədiyyələr verilmişdir.
######
Bölmənin digər xəbərləri
