Avqustun 7-də Azərbaycan Prezidenti, Ali Baş Komandan Heydər Əliyev tərəfindən dövlət mükafatları ilə təltif olunmuş polis əməkdaşlarına və onların ailə üzvlərinə medallar təqdim edilmişdir.

Bu münasibətlə Daxili İşlər Nazirliyində keçirilən mərasimi nazir, general-polkovnik Ramil Usubov açaraq bildirdi ki, dövlətimizin başçısı Heydər Əliyev Azərbaycanın suverenliyi, ərazi bütövlüyünün qorunması, Xocalı soyqırımı zamanı mülki əhaliyə yardım edilməsi, sonrakı dövrlərdə terrorçuluğa, qəsdən adam öldürmələrə, mütəşəkkil cinayətkarlığa və digər ağır cinayətlərə qarşı mübarizədə fərqlənmiş polis əməkdaşlarının xidmətlərini ayrı-ayrı vaxtlarda dövlət mükafatları ilə təltif etmişdir. Bəzi obyektiv səbəblər üzündən bu mükafatların sahiblərinin bir qismi bunu almamışdılar. Polis günündə hörmətli Prezidentimiz 10 nəfəri təltif etdi, qalanlarına isə mükafatlar indi təqdim olunur.

Sonra general-polkovnik Ramil Usubov “İgidliyə görə” və “Hərbi xidmətlərə görə” medallarını polis əməkdaşlarına və onların ailə üzvlərinə təqdim etdi.

Şəhid ailələri adından Baş Mühafizə İdarəsinin mərhum polis serjantı Akif Abdullayevin həyat yoldaşı Gülnarə Abdullayeva, Daxili Qoşunların “N” saylı hərbi hissəsinin komandiri, polkovnik Məmməd Hacıyev və başqaları çıxış etdilər, Azərbaycanın ərazi bütövlüyü, suverenliyi yolunda canlarını qurban vermiş mərd mübarizlərin xatirəsini daim əziz tutan, onların xidmətlərini daim yüksək qiymətləndirən və müxtəlif orden və medallarla təltif edən Azərbaycan Prezidenti, Ali Baş Komandan Heydər Əliyevə dərin minnətdarlıqlarını bildirdilər.

Natiqlər ölkəmizin Baş naziri təyin edilməsi münasibətilə İlham Əliyevi təbrik etdilər və dedilər ki, nəinki bütün ictimaiyyət, həm də biz hərbçilər və şəhid ailələri üçün bu, çox sevindiricidir.

Sonra nazir Ramil Usubov mərasimə yekun vurdu, daxili işlər orqanlarında və daxili qoşunlarda xidmət edən və təltif olunanlara, şəhid polis əməkdaşlarının valideynlərinə, qohumlarına təşəkkürünü bildirdi və dedi ki, onlar şəhid olmaqla əbədiyyətə qovuşublar, Azərbaycan polisi tarixində əbədi iz qoyublar. Onların həyat yolu, qəhrəmanlığı, igidliyi hər bir polis, daxili qoşun əməkdaşı üçün örnəkdir. İnanırıq ki, onlardan sonra gələn övladlar da polis və hərbi peşəni seçəcək, Vətənimizin azadlığına, daxili sabitliyin qorunmasına töhfələrini verəcəklər.

Nazir onlara həmişə diqqət və qayğı göstərmiş Ali Baş Komandana şəxsi heyət və mərasim iştirakçıları adından minnətdarlığını bildirdi. Natiq Prezidentimizin təklifi və Milli Məclisin razılığı ilə İlham Əliyevin Baş nazir təyin olunmasına da münasibətini bildirdi və dedi ki, bunu xalqımız çoxdan gözləyirdi. Azərbaycan xalqı bu gününə də, gələcəyinə də əmin ola bilər. Bu gün cənab Prezidentimizin başçılığı ilə Azərbaycan uğurlar qazanır və bu iş davam edir. Heydər Əliyev ideyaları, Heydər Əliyev məktəbi daimi, əbədi olacaqdır. Hörmətli İlham Əliyev də bunu davam etdirəcəkdir.

Mərasimdə Daxili İşlər Nazirliyinin rəhbər vəzifəli şəxsləri iştirak edirdilər.