CƏMİYYƏT
Portuqaliyanın ekoloji assosiasiyası zeytun məhsulunun gecə yığımını dayandırmağı tələb edir
Lissabon, 24 oktyabr, AZƏRTAC
“Quercus” Portuqaliya ekoloji assosiasiyası yeni hökuməti superintensiv zeytun bağlarında gecə vaxtı zeytun yığımını dərhal dayandırmağa çağırır. Bu vəziyyət Portuqaliyada hər il 70-100 min mühafizə olunan quşun ölümü ilə nəticələnir.
AZƏRTAC xəbər verir ki, zeytun məhsulunun gecə yığımının qarşısını almaq məqsədilə müvafiq inzibati orqanlara, həmçinin Təbiət və Meşələrin Mühafizəsi İnstitutuna (ICNF) hüquqi dəyişikliklərin işlənib hazırlanması barədə təklif göndərilib. Son yarım il ərzində bu yerlərdə məhz həmin dövrdə 375 ölü quş (oxuyan qaratoyuq, sarı bülbül, alacəhrə və s.) aşkarlanıb.
Hazırda Dövlət prokurorluğu həddən artıq intensiv zeytun bağlarında gecə zeytun yığımı nəticəsində quşların ölümü ilə bağlı təbiətə vurulan ziyan barədə təhqiqat aparır.
Ekoloji assosiasiya zeytun yağı istehsal edən şirkətləri də gecə vaxtı zeytun yığımından imtina etməyə çağırır.
Ekoloqlar, həmçinin izah edirlər ki, bu narahatlıq 2018-ci ilin sonunda İspaniyada dərc edilmiş “Xunta-de-Əndəlis” məruzəsi və həmin regionda superintensiv zeytun bağlarında zeytun məhsulunun mexaniki vasitələrlə gecə yığımının təsirinə dair xəbərdarlıqla bağlıdır.
Nigar Cəfərli
AZƏRTAC-ın xüsusi müxbiri
Lissabon