Pozitiv düşüncələrin həyatımıza təsiri mövzusunda onlayn təlim keçilib
Naxçıvan, 30 aprel, AZƏRTAC
Naxçıvan Muxtar Respublikası Gənclər və İdman Nazirliyi, Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyinin və “Optimal” Qrup MMC-nin birgə təşkilatçılığı ilə “Pozitiv düşüncələrin həyatımıza təsiri və karantin günlərində ruh yüksəkliyimizi artırmağın yolları” adlı onlayn təlim keçilib.
AZƏRTAC-ın Naxçıvan bürosu xəbər verir ki, 20 gənc iştirak etdiyi təlimdə Gənclər və İdman Nazirliyinin şöbə müdiri Ayaz Cabbarov mövzu ilə bağlı çıxış edib. Bildirib ki, təlimin məqsədi məhz gənclərdə pandemiya dövründə ruh yüksəkliyinin artırılması, onların asudə vaxtlarının səmərəli təşkil olunmasıdır.
Pozitiv düşünməyin həyatımızdakı müsbət rolundan ətraflı bəhs edən “Optimal” Qrup MMC-nin psixoloqu Əsmər Rzayeva qeyd edib ki, araşdırmalara görə bu şəkildə düşünən insanlar qarşılarına yeni hədəflər qoymağa və bunları həyata keçirməyə qadirdirlər. O vurğulayıb ki, pozitiv düşünmək insanlarla yaxşı münasibət qurmağa, bacarıqlı olmağa, stresdən uzaq durmağa, sağlam həyat tərzi yaşamağa stimul verir.
Təlimdə “Pozitiv düşünmək və insan münasibətləri”, “Pozitiv düşünmək və bacarıqlı olmaq”, “Pozitiv düşünmək və sağlam həyat tərzi”, “Karantin dövründə ruh yüksəkliyimiz” mövzularında gənclərlə birlikdə müzakirələr aparılıb.
Sonda gəncləri maraqlandıran suallar cavablandırılıb.
Bölmənin digər xəbərləri
