PREZİDENT İLHAM ƏLİYEV “DAŞKƏSƏN FİLİZSAFLAŞDIRMA” ASC-DƏ OLMUŞDUR
Burada dövlətimizin başçısını və xanımını böyük hörmət və ehtiramla, gül-çiçəklə qarşıladılar. Yüzlərlə yerli sakin, müəssisənin işçiləri Prezidentin pişvazına xalqımızın lideri Heydər Əliyevin və ölkə rəhbərinin portretləri, dövlət bayraqları və transparantlarla çıxmışdılar.
Azərbaycan Prezidenti əvvəlcə bu böyük ASC-nin “Daşkəsən” və “Gəncə” layihələri, gələcəkdə yaradılacaq zavodların planları ilə tanış oldu.
“Detallimited” şirkətinin baş direktoru Əli Özkurt məlumat verdi ki, investisiya proqramına əsasən, gələcəkdə bu layihələr üzrə yeni zavodlar yaradılacaq və bunun nəticəsində minlərlə yeni iş yeri açılacaqdır. Ümumilikdə 235 milyon dollar həcmində sərmayə qoyulacaq və bütün işlər yeni texnologiya əsasında görüləcəkdir. Dünyada ABŞ-dan sonra bu tipli ikinci müəssisə Azərbaycanda olacaqdır. Hazır məhsul Qazaxıstana və digər ölkələrə də göndəriləcəkdir.
İLHAM ƏLİYEV: Bu, bizdə heç vaxt olmamışdır. Buradan çıxarılan filiz həmişə Gürcüstana aparılırdı.
ƏLİ ÖZKURT: İndi hər şey burada olacaq və gənc azərbaycanlılar çalışacaqlar. Gəncədə istehsal gücü 160 min ton olan alüminium zavodu fəaliyyətə başlayacaqdır. Bütün bu işlər 2009-cu ilə qədər başa çatdırılacaqdır.
İLHAM ƏLİYEV: Cəmi neçə zavod olacaqdır?
ƏLİ ÖZKURT: Cənab Prezident, ardıcıl reduksiya zavodu, poladəritmə zavodu və Gəncədə alüminium zavodu. “Daşkəsən” layihəsi üzrə 1250, “Gəncə” layihəsi üzrə 1250, alüminium zavodunda isə 2500 işçi çalışacaqdır. 3 il ərzində 5 min yeni iş yeri yaradılacaqdır.
İLHAM ƏLİYEV: Deməli, Gəncədə və Daşkəsəndə 5 min yeni iş yeri açılacaqdır. Təxminən nə qədər məhsul istehsal edəcəksiniz?
ƏLİ ÖZKURT: Cənab Prezident, 100 min ton alüminium, 500 min ton dəmir filizi. Həmin filizdən də boru istehsal edəcəyik. Çünki bazarda boru ən qiymətli məhsuldur. Bundan başqa, armatur, habelə inşaatda istifadə olunan digər materiallar istehsal olunacaqdır.
İLHAM ƏLİYEV: Bu gün buna həm Azərbaycanda, həm də qonşu ölkələrdə böyük tələbat var. Azərbaycanda daha çox tələbat var və hələ uzun müddət ərzində bu tələbat azalmayacaq, əksinə artacaqdır. Yəni bizdə inkişaf sürətlə gedir.
ƏLİ ÖZKURT: Biz bu il Sumqayıtda 60 min ton alüminium istehsal etməyi planlaşdırmışıq.
İLHAM ƏLİYEV: Orada 30 min ton idi, indi 60 min ton. Burada da 100 min ton olacaqdır.
ƏLİ ÖZKURT: Bəli, cənab Prezident. Gəncədə istehsal olunan alüminium oksidinin 80 faizi daxili tələbata yönəldiləcəkdir.
İLHAM ƏLİYEV: Qalan hissəsini də xaricə göndərəcəksiniz?
ƏLİ ÖZKURT: Bəli.
İLHAM ƏLİYEV: İndi bizdən xaricə neçə faiz məhsul gedir.
ƏLİ ÖZKURT: Alüminium oksidinin 100 faizi. Biz bu il 425 min ton istehsal edəcəyik. Keçən il isə 400 min ton idi. Sovet dövründə heç vaxt bu həcmdə istehsal olmamışdır.
İLHAM ƏLİYEV: Bəli, gələn 3 ildə inkişafımız daha da yüksək olacaqdır. Həm təzə iş yerləri, həm yeni istehsal sahələri yaranacaq, həm də qeyri-neft sektoru, sənaye yüksək səviyyəyə çatacaqdır.
ƏLİ ÖZKURT: Cənab Prezident, dəqiq hesablamalara görə, burada hələ 250 milyon ton dəmir filizi ehtiyatı vardır. Biz ildə 2,5 milyon ton hasil edirik.
İLHAM ƏLİYEV: Yəni bizim 100 illik işimiz var.
ƏLİ ÖZKURT: Allaha şükür. Sizin sayənizdə çalışacağıq.
TAHİR KƏRİMOV (Daşkəsən rayonu İcra hakimiyyətinin başçısı): Cənab Prezident, ulu öndərimizin dövründə bu zavod 700 min ton məhsul istehsal edirdi. Yenidən hakimiyyətə gələndən sonra 1 milyon ton oldu. O dövrdən də zavodun inkişaf dövrü başlandı. Sizin rəhbərliyinizlə bu zavod yeni inkişaf dövrünü yaşayacaqdır.
İLHAM ƏLİYEV: O dövrdə sovet texnologiyası idi. Bizdə başqa texnologiya yox idi. Amma indi burada dünyadakı ən yüksək texnologiya olacaqdır.
ƏLİ ÖZKURT: Bizim müəssisə dünyada 2-ci, 3-cü olacaqdır.
İLHAM ƏLİYEV: Bütövlükdə bu, nadir bir yataqdır.
ƏLİ ÖZKURT: Bu, Allahın bir nemətidir.
İLHAM ƏLİYEV: Onun ehtiyatı Azərbaycan xalqının rifah halının yaxşılaşmasına yönəldilməlidir.
ƏLİ ÖZKURT: Cənab Prezident, biz gənclərə də şərait yaradırıq. Təhsil ocaqları ilə razılıq əldə etmişik. Tələbələrə ingilis dilində iqtisadiyyat üzrə xüsusi dərslər keçilir. Yəni kadr hazırlığına da xüsusi diqqət yetiririk.
İLHAM ƏLİYEV: Oradakı bayraq da çox böyükdür.
ƏLİ ÖZKURT: Cənab Prezident. Dağın sinəsinə vurulmuş bayraq 5 min kvadratmetrdir. Uzunluğu 100, eni isə 50 metrdir. Daim orada qalacaqdır.
X X X
Prezident İlham Əliyev “Daşkəsən Filizsaflaşdırma” ASC-nin yeni yatağının istifadəsinə başlanmasını bildirən düyməni basdı. Daha sonra isə növbəti düyməni basmaqla, dəmir filizinin daşındığı kanat yolunu işə saldı.
Sonra təntənəli mərasim keçirildi.
Mərasimi rayon icra hakimiyyətinin başçısı Tahir Kərimov açdı.
Bölmənin digər xəbərləri
