Sabirabad, 6 aprel, Mahir Babayev, AZƏRTAC

Aprelin 6-da Sabirabad şəhərində Azərbaycan Respublikasının Prezidenti İlham Əliyevin rəhbərliyi ilə sosial sahədə uğurla reallaşdırılan islahatlara həsr olunmuş regional müşavirə keçirilib. Azərbaycan Respublikası Baş nazirinin müavini, Yeni Azərbaycan Partiyası Sədrinin müavini-İcra katibi Əli Əhmədov və Milli Məclisin bir qrup deputatı müşavirədə iştirak edib.

AZƏRTAC-ın bölgə müxbiri xəbər verir ki, Baş nazirin müavini, Yeni Azərbaycan Partiyası Sədrinin müavini-İcra katibi Əli Əhmədovun rəhbərlik etdiyi nümayəndə heyəti əvvəlcə Sabirabad şəhərində ümummilli lider Heydər Əliyevin abidəsini ziyarət edib, önünə gül dəstəsi qoyublar.

Müşavirədə Yeni Azərbaycan Partiyasının Mil-Muğan bölgəsi üzrə rayon təşkilatlarının fəalları, eləcə də Sabirabad rayon ictimaiyyətinin nümayəndələri iştirak ediblər.

YAP siyasi şöbəsinin üzvü, Sabirabad Rayon İcra Hakimiyyətinin başçısı Nazim İsmayılov müşavirəni açaraq, ölkəmizdə aparılan uğurlu sosial-iqtisadi islahatlardan danışıb.

Müşavirədə çıxış edən Baş nazirin müavini, Yeni Azərbaycan Partiyası Sədrinin müavini-İcra katibi Əli Əhmədov Azərbaycan Respublikasının Prezidenti İlham Əliyevin rəhbərliyi ilə sosial sahədə çox uğurla həyata keçirilən, ilk növbədə, ölkə vətəndaşının mənafeyinin və hüquqlarının üstünlüyünü hədəf seçmiş islahatlardan söz açıb. Baş nazirin müavini qeyd edib ki, Prezident İlham Əliyev tərəfindən 2019-cu ildə əhalinin rifah halının yaxşılaşdırılması istiqamətində atılan addımlar nəticəsində ölkəmizdə təqaüdlərin 116 manatdan 160 manata, yəni 38 faiz artması nəticəsində 300 min vətəndaşın həyatında müsbətə doğru dəyişiklik baş verib: "Eyni zamanda, bu və ya digər xarakterli müavinətlər, güzəştlər alan vətəndaşlar say etibarilə ciddi şəkildə çoxalıb. Büdcə vəsaitlərinin ciddi şəkildə artımı nəticəsində Azərbaycan əhalisinin əhəmiyyətli kəsimi, xüsusilə aztəminatlı hissəsinin həyat səviyyəsinin yaxşılaşdırılması ilə əlaqədar çox ciddi işlər həyata keçirilib. Hesab edirik ki, görülən işlər sosial problemlərin həlli istiqamətində Azərbaycanda çox ciddi addımların atılmasından xəbər verir".

Qeyd olunub ki, dövlətimizin başçısının rəhbərliyi ilə uğurla həyata keçirilən davamlı islahatlar, ilk növbədə, vətəndaşların maraqlarına xidmət edir. Baş nazirin müavini həyata keçirilən dövlət proqramlarından, bölgələrdə və Bakı şəhərində reallaşan böyük infrastruktur layihələrinin əhəmiyyətindən bəhs edərək bildirib ki, bu gün Azərbaycan vətəndaşının sosial təminatı əhəmiyyətli dərəcədə yüksəlib, insanların sosial-rifah halı müqayisəolunmaz dərəcədə dəyişib, bütün bunlarla paralel olaraq, Azərbaycanın siması da tanınmaz şəkildə yenilənib. Nəzərə çatdırılıb ki, bu gün Azərbaycanda görülən böyük işlər, hökumət-vətəndaş münasibətləri, xüsusilə son zamanlar imzalanmış sərəncam və fərmanlar bir daha sübut etdi ki, Prezident İlham Əliyev hər zaman ölkə vətəndaşının yanındadır.

Baş nazirin müavini Əli Əhmədov çıxışında dövlətimizin başçısının rəhbərliyi ilə Azərbaycanın öz dinamik inkişafını təmin etdiyini və ölkəmizin əmin-amanlıq, sabitlik, təhlükəsizlik şəraitində yaşadığını bildirib. Qeyd olunub ki, Prezident İlham Əliyevin rəhbərliyi ilə həyata keçirilən sosial islahatlar məqsədyönlü dövlət siyasətinin mühüm tərkib hissəsidir.

Əli Əhmədov deyib: “Təbii ki, insanların sosial həyatının yaxşılaşdırılması, həyat səviyyəsinin, bütövlükdə ölkədə həyat səviyyəsinin artırılmasının vacib istiqamətlərindən biri insanların işlə təmin edilməsidir. Sabirabadda da bu istiqamətdə çox böyük işlər görülür, bütövlükdə Azərbaycanda son 15 il ərzində insanların işlə təmin olunması istiqamətində əhəmiyyətli addımlar atılıb. İki milyona yaxın yeni iş yerinin yaradılması Azərbaycan Prezidentinin atdığı ən ciddi sosial addımdır. İnsanların həyatının yaxşılaşdırılması Azərbaycan dövlətinin, ölkə Prezidentinin həyata keçirdiyi strategiyanın əsasını təşkil edir”.

Çıxışlarda Milli Məclisin deputatı Əhliman Əmiraslanov, YAP İmişli rayon təşkilatının sədri Səfa Ağayev, YAP Saatlı rayon təşkilatının sədri Lütfəli Şıxəliyev, YAP Beyləqan rayon təşkilatının sədri Rəfail Pətiyev, YAP Füzuli rayon təşkilatının sədri Almaz Həşimova və YAP Salyan rayon təşkilatının sədri Rəşad Cəbrayılov mövzu ilə bağlı çıxış ediblər.