Möhtərəm cənab Prezident İlham Əliyev həzrətləri!

Möhtərəm məclis iştirakçıları, alimlər, səfirlər, din xadimləri!

Bu gün çox sevinirəm ki, ulu öndər Heydər Əliyev həzrətlərinin arzuladığı kimi, müxtəlif millətlərin nümayəndələri bir süfrə arxasında oturmuşdur. Onun başında bizim hörmətli Prezidentimiz İlham Əliyev həzrətləridir. Bu müqəddəs gündə bu cür görüşmək və bir-birimizlə salamlaşmaq çox savab işdir. Ona görə ki, Allah-taala bizə Ramazan ayında Quranı nazil etmişdir. Bu ayda bir-birinə ehtiram, hörmət etmək, Allah-taalaya dua etmək vacibdir. Bu əhyə gecələrində gələcək bir il içərisində nələr olacağı, bir növ, alnımıza yazılır.

Əlbəttə, mən elə bilirəm ki, biz keçən il etdiyimiz duaların bəhrəsini bu il gördük. Yəni biz keçən il orucluq ayında dua edirdik ki, İlahi, sən bizə qüdrət, imkan ver, səadətimiz, mənəviyyatımız, başda Prezident İlham Əliyev həzrətləri olmaqla daxildə və xaricdə siyasətimiz möhkəmlənsin. Biz bu il içərisində həmin duaların bəhrələrini gördük və Azərbaycanın yüksəlişinin şahidi olduq. Əgər xaricdən kim Azərbaycana baxırsa, bunu, inkişafı daha çox görür, hiss edir.

Azərbaycanın inkişafı, əlbəttə ki, ilk növbədə onun Prezidenti, rəhbəri ilə bağlıdır. Amma bu inkişafın bünövrəsini qoyan, onu istəyən, əziyyətini çəkən ulu öndərimiz, mərhum Prezidentimiz Heydər Əliyev olmuşdur.

Mən bir dəfə ondan soruşdum ki, Bakı-Ceyhan məsələsi nə deməkdir, bununla nə olacaq? Düzü, mən bunu başa düşmürdüm. O mənə şərh edərək dedi ki, şeyx, bu bizim xalqımızın, demək olar, həm daxili, həm də xarici siyasətidir. Bununla minlərlə insan yaşayacaq, ailə dolanacaq, o cümlədən dünya siyasətində bizim böyük yerimiz olacaqdır. Bu gün biz onun bəhrəsini görürük. Onda bu, bir xəyal idi, danışıq idi. Əlbəttə, biz çox çətin dövrlərdən keçmişik. Müstəqilliyimizin 15 iliyini bu yaxında qeyd etdik. 15 il az vaxtdır, amma bu 15 ilə, keçən dövrə baxanda görürük ki, Azərbaycanın inkişafı çox yüksəkdir. Allah-taaladan arzu edirik ki, o, daha da yüksələ bilsin. Bu, Azərbaycanın dostları üçün fərəhdir, sevincdir, dualardır. Azərbaycanı istəməyənlər üçün çox böyük qubardır.

Məscidlərin tikintisi daha çox gözə çarpır, indi də məscidlər tikilir. Amma bir ilin içərisində 300-ə yaxın məktəbin inşa olunması xalqın rifahı deməkdir. Bu, xalqın, elmin yüksəlişidir.

Cənab Prezident, mən istərdim dini tərəfdən Sizə məlumat verim ki, bu il 5 minə yaxın insan Həcc ziyarətinə getmək istəyir. Halbuki vaxt var idi, sovetlər dövründə Azərbaycandan 1 nəfər, 5 nəfər, 10 nəfər Məkkəyə getmək istəyirdi. Bu, həm mənəvi saflıqdır, həm də iqtisadiyyatın yüksəlişinin əlamətidir. Deyə bilərəm ki, bu bir barometrdir, yəni bizim xalqımızın, cəmiyyətimizin orta təbəqəsinin rifahı yaxşıdır və daha da yaxşılığa doğru gedir. Bunda Sizin əməyiniz çox böyükdür. Biz Sizinlə fəxr edirik. Mən fəxr edirəm ki, Sizin kimi Prezidentim var. Fəxr edirəm ki, hətta Sizin yerişiniz, danışığınız da, Sizin prezidentlər içərisində görünüşünüz belə Allah-taala tərəfindən bəyənilmişdir. Ona görə də mən Allaha dua edirəm ki, Heydər Əliyevdən sonra Allah-taala Sizi bizə bəxş etdi. Biz Prezidentimizi göz bəbəyi kimi qorumalı, ona tərəfdar olmalı və onun getdiyi, düşündüyü yolla getməliyik.

Əlbəttə, insan səhvsiz olmaz. Cəmiyyətin içərisində bəzi çürüklər də var, bəzi danışanlar da var. Gündə qəzetlərdə şəkil, karikatura verənlər də var. Hələ Peyğəmbər dövründə Peyğəmbəri istəməyənlər çox idi. Amma Peyğəmbər Məhəmməd Əleyhissəlam qələbə çaldı. Çünki o, haqqın tərəfdarı idi. O, haqq yolu ilə gedən bir insan idi və ona görə də qələbə çaldı. Qələbə bizimlədir. Sizin başçılığınız altında biz, inşallah, bundan sonra da, bəlkə yüz illər, min illərlə qələbə çalacağıq. Azərbaycanın geriyə dönüşü yoxdur, irəliyə gedişi vardır. Bu gediş də Heydər Əliyevin qoyduğu yolla və Sizinlə bağlıdır.

Cəmiyyətin içərisində hər insanın qəlbində Allah xofu vardır. Biz - din xadimləri, adi dindar adamlar Sizi istəyir, Sizin dediklərinizə, çıxışlarınıza baxır və qiymət veririk. Bu yaxınlarda Siz Türkiyədə soydaşlarımızın, dövlət rəhbərlərinin qarşısında çıxış edəndə bir daha fəxr etdim və sübut olundu ki, təkcə Azərbaycanın deyil, bütün türkdilli xalqların hamısının rəhbəri kimi xalq Sizdən çox şey gözləyir.

Əlbəttə, müstəqilliyin bizə verdiyi bəhrələri dadırıq. Amma Ermənistan başda olmaqla mənfur düşmənlərimiz var. Yəni Qarabağ məsələsi çox çətindir. Amma Sizin rəhbərliyinizlə biz bu məsələnin həllini, inşallah yaxın vaxtlarda görəcəyik.

Mən istərdim, Sizə qardaş, dost kimi bir daha öz minnətdarlığımı bildirim. Çünki Siz öz sözünüzü demisiniz, dost sözünü demisiniz və dostluğu indiyə qədər davam etdirirsiniz. Heydər Əliyev həzrətləri də bu şəkildə davam etdirirdi. Yadınızdadırsa, Prezident seçiləndən sonra mən Sizi evə dəvət etdim. Bir az fikirləşdim, tərəddüd etdim ki, Sizi dəvət etmək olarmı. Amma heç yadımdan çıxmaz, Siz dediniz ki, mən nəyə görə dostluğumu, münasibətimi dəyişdirməliyəm, yaxud bildirməməliyəm. Mən gəlməliyəm, öz münasibətimi də bildirməliyəm. Ona görə də mən Sizə təşəkkür edirəm. Sizin ailənizə təşəkkür edirəm. Heydər Əliyevlər ailəsinə təşəkkür edirəm. Bu gün Sizin rəhbərliyiniz altında işləyən adamlara da təşəkkürümü bildirirəm ki, Sizə yaxından kömək göstərirlər.

Bu gün elə bir gündür ki, pislikdən danışmaq lazım deyil. Müxalifət deyilən söz, demək olar ki, Azərbaycanda yoxdur. Bəzi adamlar elə bilirlər ki, nəyinsə qabağında bunu yox edirlər, bəzi adamların siyasəti nəticəsində müxalifət yox oldu. Xeyr, müxalifət özü çürüdü. Ona görə ki, onun daxilində bir şey yox idi, onun dayağı, arxası yox idi. Onun arxasında xalq yox idi və bundan sonra da olmayacaqdır. Ona görə də biz Azərbaycanın gələcəyinə inanırıq.

Mən bir qardaş kimi Sizi yenə dəvət edirəm. Siz hər il gəlməyə söz vermisiniz. Mən Sizi gələn il Ramazan bayramında iştirak etməyə bir daha dəvət edirəm. Bilirəm ki, Siz sözünüzü tutan adamsınız və inşallah, gələcəksiniz. Bu bir il ərzində həm siyasi, həm iqtisadi, həm də mənəvi cəhətdən Azərbaycana parlaq inkişaf arzulayıram.

Bizim mənəviyyatımıza yeni don geydirdiyiniz üçün Sizə minnətdarlığımı bildirirəm. Bu gün Sizin rəhbərliyiniz, bilavasitə köməyinizlə Təzəpirdə, Bibiheybətdə, İçərişəhərdə, Əjdərbəydə və başqa neçə-neçə məscidlərdə təmir gedir. Siz elə şəkildə kömək göstərirsiniz ki, biz dindarlar məcbur oluruq özümüzü o şəkildə aparaq. Yəni istəyirik biz də müasirləşək, yeniləşək. Ona görə də işiniz çox olduğu halda, mənəviyyat haqqında bu qədər fikirləşdiyinizə görə Sizə minnətdarlığımızı bildiririk.

Burada oturan qardaşlarımız Moskvadan, Şimali Qafqazdan gəliblər. Başqa dinin nümayəndələri, Vatikanın nümayəndələri də burada oturublar. Bizim böyük alim Rüstəm Əliyevin oğlu, dinlərarası dialoqun katibi buradadır. Bizim üçün böyük şərəfdir ki, o, Moskvada belə bir vəzifədə işləyir. Bəzi adamlar gələ bilməyiblər. Qafqazdan olan müftilərin hamısı Sizə salam göndəriblər, Sizi, bütün Azərbaycan xalqını təbrik edirlər.

Mən Sizi həm ötən Müstəqillik günü, həm də gələcək Ramazan bayramı münasibətilə təbrik edirəm. Allah-taaladan Sizə, ailənizə cansağlığı arzulayıram. Allah-taala Sizi gözdən qorusun və Siz də xalq üçün işləyəsiniz.

Bu gün İrandan dostumuz Əhəd Qəzai də gəlibdir. O, Azərbaycan-İran Dostluq Cəmiyyətinin sədri seçilibdir. Allah hamınızı salamat etsin. Bir daha xoş gəlmisiniz!

X X X

Xarici dövlətlərin ölkəmizdə akkreditə olunmuş səfirlərinin, dini icmaların nümayəndələrinin, çoxsaylı qonaqların, Milli Məclisin deputatlarının iştirak etdiyi mərasimdə Bakı və Xəzəryanı bölgə yeparxiyasının yepiskopu Aleksandr ata, Dağ yəhudiləri icmasının sədri Semyon İxiilov Azərbaycanda tolerantlığın hökm sürdüyünü xüsusi qeyd etdilər.

Vatikan dövlətinin Azərbaycandakı nunsisi Klaudio Quçerotti Roma papası XVI Benediktin salamlarını və təbriklərini çatdırdı.

X X X

Azərbaycan Prezidenti İlham Əliyev mərasimdə nitq söylədi.

X X X

Şeyxülislam Allahşükür Paşazadə Prezident İlham Əliyevə “Qurani- Kərim” təqdim etdi.

Sonra iftar süfrəsi açıldı.