“Qarabağ”ın legioneri: Çempionluğa layiq olduğumuzu düşünürəm
Bakı, 25 aprel, AZƏRTAC
Yaxşı matç oldu, güclü rəqibə qarşı oynadıq.
Bu sözləri AZƏRTAC-a açıqlamasında “Qarabağ”ın futbolçusu Patrik Andrade Azərbaycan Kubokunun yarımfinal mərhələsində “Araz-Naxçıvan”a 3:0 hesabı ilə qalib gəldikləri cavab görüşü barədə danışarkən deyib.
O, Naxçıvan klubunun yaxşı oyun üslubuna sahib olduğunu bildirib: “Keyfiyyətli oyunçuları var. Biz də öz növbəmizdə qələbə qazanmaq üçün hər şeyi etdik. Ən önəmlisi də bu idi. Final oyunu barədə düşünməyə çox vaxtımız var”.
31 yaşlı yarımmüdafiəçi Azərbaycan çempionatında yaxşı mövsüm keçirdiklərini söyləyib: “Bu il liqada uğurlu iş gördük. Demək olar ki, bütün oyunlarda üstün tərəf olduq. Çox az matçda xal itirdik. Çempionluğa layiq olduğumuzu düşünürəm”.
P.Andrade Ağdam klubunda qalıb-qalmayacağı barədə də danışıb: “Yayda müqaviləm başa çatır. Yeni sözləşmə barədə dəqiq bir söz deyə bilmərəm”.
Qeyd edək ki, “Qarabağ” Azərbaycan Kubokunun finalında “Sabah”la qarşılaşacaq. Görüş mayın 31-də Mehdi Hüseynzadə adına Sumqayıt şəhər stadionunda keçiriləcək.
Bölmənin digər xəbərləri
