“Qarabağ”ın sabiq futbolçusu: Arxayınlaşmaq olmaz, “Braqa” Bakıya revanş arzusu ilə gələcək
Bakı, 17 fevral, AZƏRTAC
“Qarabağ”ın səfərdə “Braqa”ya bu hesabla qalib gələcəyini gözləmirdim”.
Bu sözləri AZƏRTAC-a açıqlamasında Azərbaycan millisinin və “Qarabağ”ın sabiq futbolçusu Əfran İsmayılov Ağdam təmsilçisinin UEFA Avropa Liqasının pley-off mərhələsinin ilk oyununda Portuqaliyada “Braqa” üzərində 4:2 hesablı qələbəsini şərh edərkən deyib.
Veteran yarımmüdafiəçi Azərbaycan çempionunun səfərdə tarix yazdığını bildirib: “Son illəri nəzərə alsaq, “Braqa” ilə müqayisədə, “Qarabağ”ın avrokubok təcrübəsi daha çoxdur. Qurban Qurbanovun komandası bunu meydanda sübut etməyi bacardı. Amma arxayınlaşmaq olmaz. Bakıda komandamızı çətin oyun gözləyir. Rəqib buraya revanş arzusu ilə gələcək. Ancaq bu matçda da uğurlu nəticə qazanacağımıza inanıram”.
Ə.İsmayılov “Qarabağ”ın qazandığı uğurlarla Azərbaycan futbolunu çiyinlərində daşıdığını söyləyib: “Əsl fəxr ediləsi komandamız var. Uzun illərdir “Qarabağ” avrokuboklarda tarixi nəticələr qazanır. Düzdür, “Braqa” İngiltərənin “Çelsi”, “Tottenhem” klubları kimi böyük olmasa da, onlara qarşı səfərdə bu cür mübarizə aparmaq fantastik idi”.
Qeyd edək ki, komandalar arasında cavab oyunu fevralın 22-də Bakıda keçiriləcək.
Bölmənin digər xəbərləri
