QARADAĞ RAYONUNDA ULU ÖNDƏR HEYDƏR ƏLİYEVİN DOĞUM GÜNÜ ŞƏRƏFİNƏ GÜL BAYRAMI KEÇİRİLMİŞDİR
AZƏRTAC xəbər verir ki, mayın 5-də Qaradağ rayonunun Lökbatan qəsəbəsindəki Təlim-İdman Bazasında ulu öndərimiz Heydər Əliyevin 85 illik yubileyi ilə əlaqədar ənənəvi gül bayramı keçirilmişdir.
Bayramda tanınmış ziyalılar, paytaxt sakinləri iştirak etmişlər.
Ümummilli liderimiz Heydər Əliyevin çoxşaxəli siyasi fəaliyyətindən danışan Qaradağ Rayon İcra Hakimiyyətinin başçısı Hüseyn İsrafilov bildirmişdir ki, qədirbilən xalqımız dahi rəhbərimizin xidmətlərini heç vaxt unutmayacaq. İnsanların ulu öndər Heydər Əliyevə olan sonsuz məhəbbətini müxtəlif formalarda nümayiş etdirdiklərini diqqətə çatdıran natiq qeyd etmişdir ki, gül bayramında iştirak edən yaradıcı şəxslərin, məktəblilərin dahi rəhbərimizə həsr etdikləri sənət əsərləri də xalqımızın böyük oğluna olan tükənməz sevginin bariz nümunəsidir.
Bağça uşaqlarının, məktəblilərin müxtəlif çiçək və otlardan, bitkilərdən, yarpaqlardan hazırladıqları rəngarəng sənət əsərləri gül bayramına gələnlərdə xoş ovqat yaratmışdır.
Gül bayramında dünyanın müxtəlif yerlərindən gətirilmiş, respublikamızın təbiətində təsadüf edilməyən güllər də az deyildi.
Ümummilli liderimiz Heydər Əliyevin və Zərifə xanım Əliyevanın portretlərinə güllərdən toxunmuş xalça da tamaşaçılar tərəfindən maraqla qarşılanmışdır.
Gül bayramı rəngarəng konsert proqramı ilə davam etmişdir.
