Qax rayon təhsil şöbəsindən
AZƏRTAC-ın müxbirinə bildirmişlər ki, regionların sosial-iqtisadi inkişafına dair Dövlət Proqramına uyğun olaraq, rayonun ucqar yaşayış məntəqələrindən olan Qaşqaçay kəndində dövlət vəsaiti hesabına 260 yerlik yeni məktəb binasının tikintisinə başlanılmışdır. Xüsusi layihə əsasında müasir standartlara uyğun inşa edilən ikimərtəbəli yeni məktəb binasının həyətində idman qurğuları yerləşəcək, qaçış cığırları salınacaqdır. Əl oyunları meydançasında isə tamaşaçılar üçün üstü örtülü tribunaların quraşdırılması nəzərdə tutulmuşdur. İnşaatçılar yeni məktəb binasını növbəti dərs ilinədək təhvil verməyi planlaşdırırlar.
Bundan əlavə, 2006-cı ildə Heydər Əliyev Fondunun təşəbbüsü ilə rayon mərkəzində və Almalı kəndində 240 yerlik daha 2 məktəb binasının, İbaxlı kəndində isə Yaponiya hökumətinin “Ot kökləri və insan təhlükəsizliyi” qrant proqramı çərçivəsində 100 yerlik yeni məktəb binasının tikintisi, habelə Dövlət Proqramı çərçivəsində 6 məktəbdə əsaslı təmir işlərinin aparılması da nəzərdə tutulmuşdur.
