QAXDA KƏND TƏSƏRRÜFATI MƏHSULLARI YIĞIMI DAVAM EDİR
Qax Rayon İcra Hakimiyyətinin aqrar məsələlər şöbəsindən AZƏRTAC-a bildirmişlər ki, rayonda taxıl yığımı başa çatdıqdan sonra əsas diqqət digər növ kənd təsərrüfatı məhsullarının yığımına yönəldilmişdir.
İndiyədək sahələrdən 2160 ton qarğıdalı, 4490 ton kartof, 2150 ton tərəvəz, 1500 ton bostan məhsulları yığılmış, bağlardan 2 min tondan çox meyvə toplanmışdır. Bundan əlavə, 138 hektar tütün sahəsindən 106 ton yaş tütün yığılaraq, emal müəssisəsinə təhvil verilmişdir. Hazırda rayonda kartof istisna olmaqla, digər növ kənd təsərrüfatı məhsullarının yığımı davam edir.
Rayonda payızlıqların səpininə də ciddi hazırlıq gedir. Fermerlər indiyədək 5600 hektar sahədə yay şumu aparmışlar ki, bu da keçən ilin eyni dövrünə nisbətən 2 min hektar çoxdur. Bu il rayonda 13 min hektara yaxın sahədə payızlıq bitkilərin əkilməsi proqnozlaşdırılır.
Bölmənin digər xəbərləri
