QAZAXISTAN VƏ TACİKİSTAN PREZİDENTLƏRİNİN GÖRÜŞÜ
AZƏRTAC-ın xüsusi müxbiri xəbər verir ki, Qazaxıstan Prezidenti Nursultan Nazarbayev bu ölkədə rəsmi səfərdə olan Tacikistan Prezidenti Emoməli Rəhmonovla görüşmüşdür. Danışıqlardan sonra keçirilən mətbuat konfransında Nursultan Nazarbayev bildirmişdir ki, Tacikistanın bank sahəsi, mədən sənayesi və tikinti biznesi Qazaxıstan sərmayəçiləri üçün daha cəlbedicidir. Onun sözlərinə görə dost ölkənin iqtisadiyyatına yatırılan Qazaxıstan sərmayəsi təxminən 100 milyon dollardır və bu, son hədd deyildir.
2005-ci ildə qarşılıqlı ticarət dövriyyəsi 167,5 milyon dollar olmuşdur. Tacikistanın idxal etdiyi buğda və unun 90 faizi, yanacaq-sürtkü materiallarının isə 40 faizi Qazaxıstanın payına düşür.
Danışıqlardan sonra əmək miqrantlarının hüquqlarının qorunması, iqtisadi cinayətkarlıq və vergi qanunvericiliyinin pozulması sahələrində informasiya mübadiləsinin aparılması, məxfi informasiyanın birgə qorunması, dövlət gənclər siyasəti sahəsində əməkdaşlıq və digər məsələlərlə əlaqədar sənədlər imzalanmışdır.
Bölmənin digər xəbərləri
