“QƏDİM ŞABRAN” ARXEOLOJİ ABİDƏSİ BƏRPA EDİLƏCƏK

17.11.2006 [10:04]
Çap et
A⁺ A^-

Dəvəçi rayon mədəniyyət şöbəsindən AZƏRTAC-ın müxbirinə bildirmişlər ki, Şahnəzərli kəndi yaxınlığındakı “Qədim Şabran” arxeoloji abidəsi bərpa olunacaqdır. Abidənin yerləşdiyi ərazi təqribən 2 hektar sahəni tutur və üç ildir ki, qoruq kimi fəaliyyət göstərir. Burada aparılan qazıntı işləri və araşdırmalar müvəqqəti olaraq dayandırılmışdı.

Qədim Şabranın təqribən 2500 yaşı var. Arxeoloji qazıntılar zamanı ərazidə şüşə emalatxanaları, V əsrə aid çörəkbişirmə, qızıl, mis və digər metallardan pul kəsilən sexlər, şəhərin 8 bürcü, XV əsrdə çəkilmiş 45 kilometrlik su xətti və s. aşkar edilmişdir. Şabran Albaniya dövləti zamanı massagetlərin siyasi paytaxtı, bir müddət Şirvanşahlar dövlətinin mərkəzi olmuşdur. Xatırladaq ki, böyük Azərbaycan şairi Əfzələddin Xaqani (XII əsr) Şirvanşah Əxsitanın qəzəbinə düçar olanda Şabran qalasında həbsə atılıb və məşhur “Həbsiyyə” əsərini burada yazmışdır.

Ehtimal olunur ki, qədim Şabran XVIII əsrin I yarısında Dağıstanda yaşayan tayfaların ardıcıl basqınları nəticəsində yandırılaraq dağılmışdır. Digər versiyaya görə o, şəhərin mərkəzindən keçən Şabrançayın daşması nəticəsində məhv olmuşdur.

Hazırda şəhərin qalıqları mühafizə olunur, buradan çıxarılan əşyalar isə AMEA-da tədqiq edilir.