QƏLƏBƏ GÜNÜ SƏBAİL RAYONUNDA GENİŞ QEYD EDİLMİŞDİR
AZƏRTAC xəbər verir ki, mayın 9-da faşizm üzərində Qələbənin 63-cü ildönümü münasibətilə Səbail rayonunun Bayıl yaşayış sahəsində yerləşən Sovet İttifaqı Qəhrəmanı Qafur Məmmədov adına parkda rayon rəhbərliyi, ictimaiyyətin nümayəndələri və Xəzər Hərbi Dəniz Donanmasının “N” saylı hərbi hissəsinin şəxsi heyətinin iştirakı ilə təntənəli mərasim keçirilmişdir.
Tədbirin iştirakçıları müharibə qəhrəmanlarının xatirəsinə ucaldılmış abidənin önünə gül dəstələri düzmüşlər.
Müdafiə Nazirliyi hərbi orkestrinin ifasında Azərbaycanın Dövlət himni səslənmişdir.
Səbail Rayon İcra Hakimiyyətinin başçısı Sahib Ələkbərov və başqa natiqlər veteranları Qələbənin 63-cü ildönümü münasibətilə təbrik edərək onların döyüş meydanlarında göstərdikləri qəhrəmanlıqdan söhbət açmış, gənclərin hərbi vətənpərvərlik ruhunda tərbiyəsində əvəzsiz rollarını qeyd etmişlər.
Cəbhədə yüz minlərlə qurban vermiş Azərbaycanın cəsur övladlarının müharibə salnaməsinə yazdıqları qəhrəmanlıq səhifələri də xatırlanmışdır.
Sonda veteranlara gül dəstələri təqdim edilmiş və məktəblilərin ifasında ədəbi-bədii kompozisiya göstərilmişdir.
Mərasimdə Prezidentin İcra Aparatının ictimai-siyasi məsələlər şöbəsinin xaricdə yaşayan azərbaycanlılarla iş sektorunun müdiri Qafar Əliyev, Milli Məclisin deputatları Gülər Əhmədova, Aydın Mirzəzadə və digər rəsmi şəxslər iştirak etmişlər.
######
Bölmənin digər xəbərləri
