Bakı, 12 oktyabr, AZƏRTAC

Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Dialoq və İnkişaf Naminə” İctimai Birliyi (DİNİB) "Qloballaşma dövründə milli-mənəvi dəyərlərin qorunması” adlı layihəsi çərçivəsində Azərbaycan Dövlət Pedaqoji Universiteti nəzdində Azərbaycan Dövlət Pedaqoji Kollecində növbəti tədbirini keçirib.

İctimai Birlikdən AZƏRTAC-a bildirilib ki, tədbirdə əvvəlcə Azərbaycan Respublikasının Dövlət Himni səsləndirilib və ölkəmizin ərazi bütövlüyü və müstəqilliyi uğrunda şəhid olan qəhrəmanlarımızın əziz xatirəsi bir dəqiqəlik sükutla yad edilib.

Daha sonra “Dialoq və İnkişaf Naminə” İctimai Birliyi idarə heyətinin üzvü Günay Hacıyeva tədbiri açaraq layihə haqqında geniş məlumat verib. Bildirilib ki, müasir dövrdə milli dəyərlərə qarşı çıxmaq təşəbbüsləri olduğu üçün belə vacib məsələni daim diqqətdə saxlamaq zərurəti yaranıb. Bu dəyərlərin qorunub saxlanılmasının hər birimizin borcu olduğunu nəzərə alaraq təşkilat bu mövzuda tələbə və gənclərlə görüş və konfranslar keçirməyi qarşısına məqsəd qoyub. Gələcəyin müəllimləri ilə bu mövzunu müzakirə etmək çox aktual və önəmlidir. Günay Hacıyeva, həmçinin dövlətin təməl daşı olan ailə dəyərlərinin qorunub saxlanılması mövzusuna da toxundu. Sağlam ailə münasibətləri cəmiyyət üçün faydalı vətəndaşların yetişdirilməsinin əsas özəyidir.

Azərbaycan Dövlət Pedaqoji Kollecinin direktoru İsrail İsgəndərov qeyd edib ki, milli-mənəvi dəyərlərin qorunması cəmiyyətin inkişafı ilə mütləq şəkildə əlaqəlidir. Çünki hər bir xalq özünəməxsus dəyərlərin daşıyıcısı və qoruyucusudur. Azərbaycan xalqı da öz milli-mənəvi dəyərləri ilə böyük inkişaf yolu keçib və gənc nəsillərə də bu dəyərlər ötürülüb. Xalqımızın tarixən qazandığı nailiyyət və keyfiyyətlər bizim milli-mənəvi dəyərlərimizdir. Mənəvi dəyərlər insanı cəmiyyətdə formalaşdıran, inkişafına kömək edən davranış qaydalarıdır.

“Dialoq və İnkişaf Naminə” İctimai Birliyin sədri Çingiz Bayramov layihənin əhəmiyyətindən danışaraq bildirib ki, mənəvi dəyərlərimizin inkişafı, qorunması üçün ədəbiyyatımızın, musiqimizin rolu da inkar edilməzdir. O, bu mənada milli-mənəvi sərvətlərin qorunub saxlanılmasında, həmçinin Azərbaycan-UNESCO əlaqələrinin inkişafında Heydər Əliyev Fondunun və onun rəhbəri, Birinci vitse-prezident Mehriban Əliyevanın rolunu xüsusi qeyd edib. Çingiz Bayramov, həmçinin deyib ki, milli-mənəvi dəyərlərimizə, tariximizə, ədəbiyyatımıza, dilimiz və dinimizə bağlılığımız sayəsində Azərbaycan müxtəlif sivilizasiyalararası və dinlərarası dialoqun keçirilməsi üçün ideal məkan seçilir və ölkəmizin müxtəlif beynəlxalq qurumlarla inkişaf edən xətlə əməkdaşlığını şərtləndirir.

Kollecin direktor müavini Nigar Şirəliyeva bugünkü gənclərin, xüsusilə də qızlarımızın düzgün vətəndaş kimi yetişdirilməsində rolundan danışıb. Diqqətə çatdırıb ki, bəzən mənəvi dəyərlər dedikdə, sadəcə, dini dəyərlər və yaxud əxlaqı dəyərlər başa düşülür. Ancaq əslində mənəvi dəyərlərin əhatəsi çox genişdir. Yəni, dil, din, mədəniyyət, bayraq, himn, adət-ənənə - hamısı mənəvi dəyər hesab olunur. Məhz Azərbaycan dövlətinin məqsədi də milli-mənəvi dəyərlərimizi daim qoruyub saxlamaq və gələcək nəsillərə ötürməkdir.

DİNİB-in İdarə Heyətinin üzvü Vidadi Məmmədov çıxış edərək bildirib ki, tarixin süzgəcindən keçmiş milli-mənəvi dəyərlərimizin qloballaşma dövründə qorunub saxlanılması hər bir azərbaycanlının mənəvi borcu və vəzifəsidir. Natiq çıxışına davam edərək, ulu öndər Heydər Əliyevin milli-mənəvi dəyərlərə verdiyi qiyməti nümunə olaraq gənclərin diqqətinə çatdırıb: “Hər xalqın özünə, öz tarixi köklərinə, əcdadları tərəfindən yaradılmış milli-mənəvi dəyərlərinə bağlılığı böyük amildir. Biz də indi dünyanın mütərəqqi mənəvi dəyərlərindən istifadə edərək, xalqımızın mədəni səviyyəsini daha da inkişaf etdirərək, gənc nəsli daha da sağlam əhval-ruhiyyədə, saf əxlaqi əhval-ruhiyyədə tərbiyələndirməliyik”.

Tədbir tələbələrin sualları və maraqlı çıxışları ilə yekunlaşıb.