Qobustanda “Vətənin müdafiəsinə hazıram!” devizi altında kütləvi tədbir keçirilib
Bakı, 15 fevral, AZƏRTAC
Fevralın 15-də Səfərbərlik və Hərbi Xidmətə Çağırış üzrə Dövlət Xidməti Azərbaycan Respublikası Gənclər Fondu ilə birlikdə Qobustanda “Vətənin müdafiəsinə hazıram!” devizi altında kütləvi tədbir keçirib.
Xidmətdən AZƏRTAC-a bildiriblər ki, tədbir iştirakçıları əvvəlcə ulu öndər Heydər Əliyevin abidəsini ziyarət ediblər.
Orta məktəblərin yuxarı sinif şagirdlərinin, gənclərin, ictimaiyyətin nümayəndələrinin iştirakı ilə Qobustan Gənclər Mərkəzində davam etdirilən tədbirdə Səfərbərlik və Hərbi Xidmətə Çağırış üzrə Dövlət Xidməti Aparatının şöbə rəisi, polkovnik Niyaz Məmmədov çıxış edərək görüşün məqsədi haqqında ətraflı məlumat verib. Qeyd olunub ki, belə tədbirlərdə müstəqil dövlətçiliyimizin əsas atributlarından olan Azərbaycan Silahlı Qüvvələrinin əldə etdiyi nailiyyətlər, güclü ordu quruculuğu prosesinin əhəmiyyəti ictimaiyyətin diqqətinə çatdırılır. Bundan əlavə, “Vətənin müdafiəsinə hazıram!” devizi ilə kütləvi tədbir qəhrəmanlıq nümunələrinin təbliği, Vətənə, xalqa və dövlətçilik ideyalarına hörmət hisslərini gücləndirmək, gənc nəsli milli dövlətçilik ruhunda tərbiyə etmək məqsədi daşıyır.
Gənclər Fondunun nümayəndəsi Ramil Məmmədov respublikamızda gənclər siyasətinin səmərəli nəticələrinə toxunub.
Qobustan Rayon İcra Hakimiyyəti başçısının müavini Məharət Əkbərov gənclərin vətənpərvərlik tərbiyəsi istiqamətində görülmüş işlərdən söz açıb, tədbirlərin əhəmiyyətini vurğulayıb.
“Tərxis Olunmuş Hərbçilərin Gəncləri Maarifləndirmə” İctimai Birliyinin sədri Emin Həsənli və “İrəli” İctimai Birliyinin baş katibi Şahin Rəhmanlı son illər gənclərin hərbi peşəyə marağının artdığını vurğulayıblar.
Şəhid ailələrinin üzvləri, müharibə veteranları onlara göstərilən dövlət qayğısından danışaraq, gənc nəslin nümayəndələrinə Vətən uğrunda canından keçmiş oğul və qızlardan nümunə götürməyi tövsiyə ediblər.
Tədbirdə şəhid ailələrinin üzvlərinə, gənclərin çağırışaqədər hazırlığı fənnini tədris edən müəllimlərə, eləcə də bu dərslərdə fəal iştirak edən şagirdlərə mükafatlar təqdim olunub.
Sonda hərbi vətənpərvərlik mahnılarının mahir ifaçısı Şəmistan Əlizamanlı və rayonun özfəaliyyət kollektivlərinin üzvləri bədii proqramla çıxış ediblər.
Bölmənin digər xəbərləri
