“QU GÖLÜ” TAMAŞASINDA RUSİYANIN BALETULDUZU SVETLANA ZAXAROVA ÇIXIŞ EDƏCƏKDİR
Teatrdan AZƏRTAC-a verilən məlumata görə, öz səhnəsində dünya şöhrətli vokal və balet sənəti ulduzlarının çıxışını təşkil edən teatr rəhbərliyi bu dəfə baletsevərlərə “Qu gölü” tamaşasını təqdim etməyə hazırlaşır. Balet həvəskarları tamaşada Rusiya Akademik Böyük Teatrının balerinası, Rusiyanın əməkdar artisti, balet artistlərinin dörd beynəlxalq müsabiqəsinin qızıl medalına layiq görülmüş, üç dəfə “Qızıl maska” milli teatr mükafatının laureatı, “Benua de lya dans” beynəlxalq balet Oskarı və İtaliyanın 2003-cü il beynəlxalq “Etualı” ali mükafatının sahibi Svetlana Zaxarovanın çıxışını seyr edə biləcəklər.
Dünya baletinin ən parlaq ulduzlarından biri olan Svetlana Zaxarovanın qazandığı uğurları yalnız Qalina Ulanova, Maya Plisetskaya kimi balet nəhənglərinin nailiyyətləri ilə müqayisə etmək olar. Əlbəttə, belə məşhur balet ulduzunun Bakıya gəlişi paytaxtımızın mədəni həyatında son dərəcə əhəmiyyətli hadisədir. Bu möhtəşəm layihənin gerçəkləşməsində teatra Azərbaycan Beynəlxalq Bankının tərkibində fəaliyyət göstərən Beynəlxalq Sığorta Şirkəti yardım göstərəcəkdir.
Bölmənin digər xəbərləri
