Ramazanovların sahibsiz itlər üçün sığınacağı: 2 hektar ərazidə 300 itə qulluq edilir
Zaqatala, 7 oktyabr, AZƏRTAC
Zaqatala sakinləri Nizami və bacısı Nərmin Ramazanovlar 10 ildən çoxdur sahibsiz itlərə qulluq edirlər. Onlar hətta itlər üçün sığınacaq da yaradıblar.
AZƏRTAC-ın müxbiri yolunu Zaqatalanın Aşağı Tala kəndi ərazisində yerləşən həmin sığınacaqdan salıb, onlarla görüşüb, söhbət edib.
Bacı-qardaş uzun illərdir avtomobil vuran və küçələrdə yaşayan xəstə, yaralı itlərə qulluq edir, onların yaşaması üçün çalışırlar. Nizami bildirir ki, əvvəllər evlərinin bağçasında heyvanlara baxıblar, lakin vaxt keçdikcə onların sayı artıb. Beləcə heyvanlar üçün məkan düzəltməyə qərar veriblər. Ramazanovlar kəndin kənarında icarəyə 2 hektar yer götürüblər. Orada maşın vuran, yaralanan 300-ə yaxın itə qulluq göstərirlər.
Sığınacağa yaxınlaşırıq, itlər bizi görüb hürməyə başlayırlar. Nizami deyir ki, itlər bizə uyğunlaşmalı və təhlükəsiz olduğunuzu anlamalıdırlar. Bizi müşayiət edən Nərmindən bu qədər itin necə qidalanması ilə maraqlanırıq. Öyrənirik ki, itlərin gündəlik yemlənməsi onların başlıca qayğısıdır. Belə ki, gün ərzində itlərin yemlənməsinə 400 kiloqram ərzaq tələb olunur. Bunu isə ancaq heyvansevərlərin, xeyriyyəçi insanların köməyi sayəsində edə bilirlər. Xeyriyyəçilik aksiyası baş tutmayanda isə bütün çətinlik Ramazanovların üzərinə düşür.
Nizami əlavə edir ki, onların əsas məqsədi itlərin qısırlaşdırılmasıdır. Buna isə xeyli vəsait tələb olunur. Doğrudur, onlara qısırlaşdırma prosesində IDEA İctimai Birliyinin nümayəndələri də yaxından köməklik göstərirlər. Belə ki, 30 baş itin Bakıya göndərilməsi üçün onlara 500 manat vəsait tələb olunur. Bunu da ancaq aksiyalarla, heyvansevərlərin köməyi ilə toplaya bilirlər. Əgər onlara dəstək artırılsa, qısırlaşdırma prosesini bir neçə dəfə çoxalda və təhlükəni sovuşdura bilərlər.
Ramazanovlardan onu da öyrənirik ki, sığınacaqda təkcə Zaqatala rayonundan deyil, qonşu Qaxdan, Şəkidən, Balakəndən, hətta Bakıdan, Sumqayıtdan, Sabirabad və Qubadan belə gətirilən itlər var.
Burada olduğumuz müddətdə diqqətimizi bir məqam da çəkdi. Nizami yaralı itlərdən birinin sarğısını özü dəyişdi. Bildirdi ki, bu itin müalicəsi və əməliyyatı üçün Bakıdakı klinikalardan biri min manat pul istəmişdi. Lakin təcrübəsinə əsaslanaraq, həm də yaxın dostlarının köməyi ilə itə ilkin yardım göstərib və artıq müalicələr də effektini verməkdədir.
Ramazanovların bir istəyi var ki, bölgədə sahibsiz, yaxud ev heyvanları üçün tibb xidməti mərkəzi yaradılsın. Əgər belə olarsa, onlar daha çox xəstə, yaralı iti həm müalicə edə, həm də qısırlaşdıra bilərlər. Bu isə onlarla insanın həyatını təhlükələrdən qurtarmış olacaq.
Bölmənin digər xəbərləri
