Rəqəmsal bankçılıq İslam maliyyəsinin mühüm istiqamətlərindən birinə çevrilib - ŞƏRH
Bakı, 28 iyul, AZƏRTAC
Son illərdə İslam maliyyəsi sahəsində informasiya-kommunikasiya texnologiyalarının (İKT) və süni intellektin tətbiqi sürətlə genişlənir. Qlobal miqyasda artıq 400-dən çox İslam maliyyəsi yönümlü fintex platforması fəaliyyət göstərir və bu platformalar müxtəlif rəqəmsal maliyyə həlləri təqdim edir.
Bu sözləri AZƏRTAC-a açıqlamasında İqtisadi Resursların Öyrənilməsi Mərkəzinin sədri Ruslan Atakişiyev deyib.
“Bununla yanaşı, rəqəmsal bankçılıq da İslam maliyyəsinin mühüm istiqamətlərindən birinə çevrilib. Məsələn, Türkiyə təcrübəsinə nəzər saldıqda, burada filialsız fəaliyyət göstərən, xidmətlərini tamamilə onlayn və mobil tətbiqlər vasitəsilə təqdim edən İslam banklarının fəaliyyət göstərdiyini görürük”, - deyə o bildirib.
Ruslan Atakişiyev əlavə edib ki, dünyada bu istiqamətdə inkişafın daha da sürətlənəcəyi gözlənilir. Xüsusilə süni intellektin tətbiqi hesabına şəriət uyğunluğunun qiymətləndirilməsi daha operativ və səmərəli həyata keçiriləcək. Gələcəkdə maliyyə məhsulları və müqavilələrin şəriət prinsiplərinə uyğunluğu süni intellektəsaslı sistemlər vasitəsilə yoxlanılacaq.
Bölmənin digər xəbərləri
