CƏMİYYƏT
Rəşad Mahmudov: Vətəndaşlar “Evdə qal” kampaniyasına fəal qoşulmalı, karantin qaydalarına ciddi əməl etməlidirlər
![Rəşad Mahmudov: Vətəndaşlar “Evdə qal” kampaniyasına fəal qoşulmalı, karantin qaydalarına ciddi əməl etməlidirlər](/files/2020/2/1200x630/15883075981272163696_1200x630.jpg)
Bakı, 1 may, Səadət Hakıyeva, AZƏRTAC
Təcrübə göstərir ki, hazırda koronavirus pandemiyası ilə mübarizədə vaxtında qabaqlayıcı tədbirlər görən ölkələrdə vəziyyət qənaətbəxşdir. Qürur duyulası haldır ki, Azərbaycan da bu ölkələr sırasında öndə gedir. Təbii ki, bu, dövlətin vaxtında gördüyü tədbirlər, cəmiyyət tərəfindən qoyulan qaydalara riayət edilməsi nəticəsində mümkün olub. Əhalinin demək olar ki, 75 faizi bu məsələdə həssas yanaşmasaydı, müsbət nəticələr əldə edə bilməzdik.
Bu sözləri AZƏRTAC-a açıqlamasında Milli Məclisin deputatı, Səhiyyə komitəsi sədrinin müavini, tibb elmləri doktoru Rəşad Mahmudov deyib.
Səhiyyə komitəsi sədrinin müavini tibbi nöqteyi-nəzərdən zaman-zaman baş verən virus xəstəliklərinin tez bir zamanda keçib getmədiyini diqqətə çatdırıb. Bildirib ki, bu cür xəstəliklər tədricən, mərhələli şəkildə yoxa çıxır. Tibb elmləri doktoru məhz bu səbəbdən koronavirusun tamamilə yoxa çıxacağı ilə bağlı hansısa dəqiqi tarixi gözləməyin tibbi cəhətdən qeyri-məntiqi fikir olduğunu deyib. Diqqətə çatdırırb ki, Operativ Qərargah aprelin 27-dən etibarən karantin rejiminin qaydalarının yumşaldılmasına qərar verib və bununla da ilk mərhələ başlayıb. Vəziyyətdən arxayınlaşaraq, özünütəcrid və sanitariya qaydalarına əməl etməsək, ciddi problemlərlə üzləşə bilərik və bu qədər çəkilən əziyyətimiz, zəhmətimiz hədər gedər. Əhalinin bir milyon nəfərinə düşən xəstələrin sayı nə qədər az olsa da, bundan arxayınlaşmaq olmaz. Bu xəstəliyin zəmanəti yoxdur. Təsəvvür edin, əgər Çində bir nəfər bu virusu bütün dünyaya yayıbsa, əlavə izaha ehtiyac duymuram. Geniş formada yayılma bu cür xəstəliklərə xas olan bir əlamətdir.
R.Mahmudov deyib: “Bir həkim kimi bütün vətəndaşların diqqətini bir məqama yönəltmək istəyirəm. Dövlətimizin, Operativ Qərargahın qərarlarına əməl edək, qaydaları pozmayaq. Sizi əmin edirəm ki, Ümumdünya Səhiyyə Təşkilatı, tibb elmi, bu prosesin xüsusiyyətləri, yəni yaşaması, yayılma müddəti və sona çatması ilə bağlı konkret nəsə deməkdə, nəticə çıxarmaqda acizdir. Dünya təcrübəsi də göstərdi ki, xəstəlik prosesi ölkələrdə fərqli gedir. Pandemiya ilə bağlı konkret nəsə deyilmədiyi halda, heç bir hökumət özünü rahat, arxayın hiss edə bilməz. Təbii ki, burada hər şeyin önündə insan sağlamlığı dayanır. Qaydalara əməl etməsək, hadisələr bizim ziyanımıza işləyər və biz böyük fəlakətlə qarşılaşa bilərik. Düşünürəm ki, hazırda yaşadığımız müddət bizim virutik xəstəliklə yaşamaq və onunla birgə həyatımıza davam etmək xüsusiyyətlərini özündə əks etdirir. Yəni son dərəcə diqqətli və ehtiyatlı olmaqla, virutik xəstəlik dövründə işləyə bilmək, təhsil almaq, gündəlik həyatımıza davam etməyi bacarmaq lazımdır. Bu xəstəlik bizi tərk edənə kimi onunla yaşamağa məhkumuq”.
Deputat xəstəliklə bağlı ölkəmizdə kifayət qədər maarifləndirici işlər aparıldığını diqqətə çatdırıb. O, bunlarla kifayətlənməyərək əhalinin məlumatlandırılması ilə bağlı işlərin gücləndirilməsini, yeni videoçarxların hazırlanmasını məqsədəuyğun hesab edib. Vətəndaşlar “evdəqal” kampaniyasına fəal qoşulmalı və ona əməl etməlidirlər.
“Əminəm ki, indiyə qədər atdığımız addımlarda olduğu kimi, bundan sonra da əldə edilən uğurları davam etdirərək mərhələli şəkildə dövlətimizin və Operativ Qərargahın rahat qərarlar verməsi üçün onlara imkan yaratmalıyıq. Biz bununla prosesə daha tez yekun vura bilərik. Əks təqdirdə, qaydalar yenidən sərtləşdirilə bilər”, -deyə Milli Məclisin deputatı vurğulayıb.