RESPUBLİKA BAŞ PROKURORLUĞU MƏTBUAT XİDMƏTİNİN MƏLUMATI
Iyulun 31-də Azərbaycan Respublikasının Baş Prokurorluğunda Avropa Şurası Baş Katibinin müavini Hans Kristian Krüqer və onu müşayiət edən şəxslərlə görüş keçirilmişdir.
Baş Prokuror Z.Qaralov qonaqları səmimi salamlayaraq qeyd etmişdir ki, möhtərəm Prezidentimiz cənab Heydər Əliyevin məqsədyönlü və səmərəli fəaliyyəti nəticəsində Azərbaycan yeni minilliyin ilk günlərində ən mötəbər beynəlxalq qurumlardan biri olan Avropa Şurasının üzvlüyünə qəbul olunmuşdur. Bu gün biz demokratik, hüquqi dövlət quruculuğu yolu ilə inamla irəliləyirik. Ölkəmizdə dayanıqlı sabitlik hökm sürür. Hüquq qaydalarının möhkəmləndirilməsi, cinayətkarlıqla mübarizə, insan hüquq və azadlıqlarının müdafiəsi sahəsində əldə olunan nəticələr təqdirəlayiqdir. Lakin ərazilərimizin 20 faizinin erməni qəsbkarları tərəfindən işğal edilməsi, bir tərəfdən bir milyonadək həmyerlimizin hüquqlarının kütləvi surətdə pozulmasına, onların öz yurdlarından didərgin düşməsinə, adi məişət şəraitindən məhrum olmasına, digər tərəfdən isə işğal altında olan torpaqlardan silah alveri, narkotik vasitələr istehsalı və daşınması məqsədi ilə istifadə olunmasına, terrorizm yuvasına çevrilməsinə gətirib çıxarmışdır. Dağlıq Qarabağda qondarma prezident seçkilərinin keçirilməsinə hazırlıq görülməsi də beynəlxalq normaların kobud pozulmasının, onlara etinasız münasibət bəslənilməsinin təzahürüdür.
Azərbaycan Respublikası Milli Məclisinin üzvü, cənab İlham Əliyev Dağlıq Qarabağ probleminin, erməni terrorizminin mahiyyətini Avropa Şurasının mötəbər tribunalarından dəfələrlə dünya ictimaiyyətinə çatdırmışdır. Bütün bunların nəticəsidir ki, Avropa Şurası artıq, Dağlıq Qarabağ münaqişəsi üzrə məruzəçi təyin etmişdir. Azərbaycan xalqı əmindir ki, Avropa Şurası erməni terrorizminin və təcavüzkar separatçılığının qarşısının alınması üçün bütün imkanlardan istifadə edəcəkdir.
Baş Prokuror sözünə davam edərək Prokurorluqda keçirilən islahatlardan, prokurorluğun fəaliyyətini nizamlayan qanunvericilik bazasının yaradılmasından, prokurorluqda aparılan kadr dəyişikliklərindən ətraflı məlumat verməklə yanaşı, ilk dəfə işə qəbul edilmək arzusunda olan şəxslərin aşkarlıq şəraitində, şəffaf prosedurlarla müsabiqə yolu ilə prokurorluğa qəbulundan bəhs etmişdir. Natiq daha sonra ölkəmizin Konstitusiyasına dəyişikliklər edilməsinin labüd olduğunu qeyd edərək, keçiriləcək referendumdan, ediləcək dəyişikliklərin mahiyyətindən danışmış, Prokurorluğa qanunvericilik təşəbbüsü, vətəndaşlara isə Konstitusiya Məhkəməsinə birbaşa müraciət etmək hüququnun verilməsinin və digər məsələlərin əhəmiyyətini vurğulamışdır.
Cənab Hans Kristian Krüqer səmimi qəbul üçün minnətdarlığını bildirərək, prokurorluqda aparılan islahatları yüksək qiymətləndirmiş, Konstitusiya ilə prokurorluğa qanunvericilik təşəbbüsü hüququnun verilməsini əhəmiyyətli hal kimi qeyd etmişdir. O, terrorizmlə, silah və narkotik vasitələr alveri ilə, separatçılıqla mübarizənin vacibliyini göstərmiş, Dağlıq Qarabağda qondarma prezident seçkiləri keçirilməsini Dağlıq Qarabağ münaqişəsinin sülh yolu ilə həll olunması yolunda maneə kimi qiymətləndirmiş, Azərbaycanın bu və ya digər beynəlxalq problemlərinin Avropa Şurası vasitəsilə haqq-ədalətlə həll olunacağına əminliyini bildirmişdir.
Görüş zamanı fikir mübadiləsi aparılmış, tərəfləri maraqlandıran suallara ətraflı cavab verilmişdir.
Bölmənin digər xəbərləri
