Respublika Gənclər Kitabxanası Abuzər Xələfovun xatirəsinə həsr olunmuş videoçarx hazırlayıb
Bakı, 2 may, AZƏRTAC
Cəfər Cabbarlı adına Respublika Gənclər Kitabxanası Əməkdar elm xadimi, Bakı Dövlət Universiteti kitabxanaşünaslıq kafedrasının müdiri, professor Abuzər Xələfovun xatirəsinə həsr olunmuş virtual sərgi və videoçarx hazırlayıb.
AZƏRTAC xəbər verir ki, kitabxananın şöbə müdiri Nübar Cəlilova tərəfindən hazırlanmış videoçarx Abuzər Xələfovun həyat və yaradıcılığına, bir peşəkar kimi elmi fəaliyyətinin bir sıra aspektlərinə həsr olunub. Çarxda müstəqil “Kitabxanaçılıq” fakültəsinin yaradılması dövrü haqqında söhbət açılıb, bu dövrdə Abuzər Xələfovun müstəsna rolu qeyd edilib. Həmçinin videoçarxda görkəmli alimin vəfatı ilə əlaqədar ölkə başçısının imzaladığı nekroloqda yazılan başsağlığı mətni də səsləndirilib, professorun müxtəlif illərdə çəkdirdiyi şəxsi və işgüzar foto qalereyasından şəkillər paylaşılıb.
Eyni zamanda, kitabxananın hüquqi informasiya şöbəsinin müdiri Günay Həsənova tərəfindən təqdim edilmiş virtual sərgidə tarix elmləri doktoru, professor Abuzər Xələfovun həyat və yaradıcılığına, onun təhsil illəri, müəllimləri haqqında məlumat verilib. Virtual sərgidə professorun elmi müdafiələri, onun rəhbərliyi altında aparılan müdafiə mövzularından və kitabxanaşünaslıq-biblioqrafiya elmi sahəsində mütəxəssis, elmi-pedaqoji kadrların hazırlığında oynadığı əvəzsiz roldan danışılıb. Təqdim olunan virtual sərgidə Mədəniyyət naziri Əbülfəs Qarayevin görkəmli professor haqqında söylədiyi fikirlər də yer alıb.
Virtual sərgidə professorun müəllifi olduğu kitabların bir qismi haqqında ətraflı məlumat verilib. Sərgidə Bakı Dövlət Universitetinin fəxri professoru A.Xələfovun mükafatlarının siyahısı, foto qalereyasından şəkillər də yer alıb.
Sözügedən videoçarx və virtual sərgi ilə kitabxananın “Instagram” və “Facebook” səhifələri vasitəsilə tanış ola bilərsiniz.
Qeyd edək ki, ölkəmizdə kitabxanaçılıq, biblioqrafiya elmlərinin və ali kitabxanaçılıq təhsilinin yaranması və formalaşması onun adı ilə bağlıdır. Öz işinin peşəkarı olan bu insan Azərbaycanda neçə-neçə kitabxanaçılar yetişdirib.
Bölmənin digər xəbərləri
