Fevralın 21-də “Ulduz” iqamətgahında Rusiya Federasiyasının Prezidenti Vladimir Putinə Şeyxülislam ordeni təqdim edilmişdir. Bu münasibətlə təşkil olunmuş mərasimi Qafqaz Müsəlmanları İdarəsinin sədri Şeyxülislam hacı ALLAHŞÜKÜR PAŞAZADƏ açaraq dedi:

- Bismillahir-rəhmanir-rəhim!

Zati-aliləri Rusiya Federasiyasının Prezidenti möhtərəm Vladimir Vladimiroviç Putin həzrətləri!

Siz bu gün bütün Azərbaycan xalqının ən dəyərli və ehtiramlı qonağısınız. Bu xalqın övladı kimi mən zati-alilərinizi Azərbaycan torpağında səmimi qəlbdən salamlayır və Allaha dua edir, həm bu səfərinizdə, həm də, ümumiyyətlə, xalqımızın əmin-amanlığı, xoşbəxt gələcəyi, rifahı naminə Azərbaycan Respublikasının Prezidenti cənab İlham Əliyev ilə gələcək işbirliyinizdə böyük uğur və nailiyyətlər diləyirəm.

Müdriklik göstərərək Sizlər öz fəaliyyətinizlə belə bir həqiqəti sübut etmisiniz ki, yalnız birgə səylər və qarşılıqlı xeyirxah niyyətlər cari problemlərin həllinə, rifaha nail olunmasına və xalqlarımız üçün layiqli həyatın təmininə aparır.

Rusiya fövqəldövlətdir və ona bəslənən ümidlər də böyükdür. Bunu deyərək, biz xalqımızın ən ağrılı problemi olan Qarabağ düyününün açılmasında oynaya biləcək rolu nəzərdə tuturuq. Bu məsələdə Azərbaycan xalqı Rusiyadan əsil dost dəstəyi umur və onun ədaləti üstün tutacağına inanır.

Biz din xadimləri üçün xüsusi önəm kəsb edən budur ki, Rusiyada zati-aliləriniz, Azərbaycanda isə cənab İlham Əliyev dövlətin, bəlkə də, ən əsas vəzifələrindən biri olaraq, elə bir vətəndaş cəmiyyətinin qurulmasına çalışırsınız ki, burada dini, milli mənsubiyyətindən asılı olmayaraq, hər bir insan özünü cəmiyyətin tam hüquqlu vətəndaşı kimi hiss edə bilsin. Bu sahədə Sizin səyləriniz olduqca təqdirəlayiqdir və həm müsəlmanlar, həm də xristianlar tərəfindən böyük rəğbətlə qarşılanır.

Sizin son olaylarla, əziz Peyğəmbərimiz Həzrəti-Məhəmməd Salavatullahın təhqir edilməsi ilə bağlı qətiyyətli mövqe nümayiş etdirməyinizi, belə halları birmənalı şəkildə pisləməyinizi məhz tolerantlığa, dini dəyərlərə verdiyiniz yüksək qiymətin və böyük önəmin parlaq təzahürü kimi qiymətləndiririk.

Mən Sizin dini dəyərlərə necə ehtiramla yanaşmağınızın şəxsən şahidi olmuşam. Bu isə təbii ki, həyatda öz bəhrələrini göstərir, nəticə etibarilə cəmiyyətin, xalqın, ayrı-ayrılıqda hər bir dindarın maraqlarına cavab verir. Bütün bunları nəzərə alaraq, Qafqaz Müsəlmanları İdarəsinin Qazılar və Elmi-Dini Şuraları yekdilliklə qərara qəbul ediblər. İcazənizlə bu qərarla Sizi tanış etmək istəyərdim.

- Bismillahir-rəhmanir-rəhim!

Bir olan Allahın adı ilə! Qafqaz Müsəlmanları İdarəsinin Qazılar Şurası və Elmi-Dini Şurası qərara alır:

“Xalqlar arasında sülhə və həmrəyliyə nail olmağa, xalqlar arasında tolerantlığın dövlət siyasəti səviyyəsinə qaldırılmasına, müxtəlif millətlərdən və dini etiqadlardan olan adamları yaxınlaşdırmağa kömək edən ümumbəşəri mənəvi dəyərlərin bərqərar edilməsinə yönəldilmiş səmərəli fəaliyyətinə görə Rusiya Federasiyasının Prezidenti Vladimir Vladimiroviç Putin Şeyxülislam ordeni ilə təltif edilsin.

Bakı şəhəri, 20 fevral 2006-cı il”.

Qafqaz Müsəlmanları İdarəsinin başçısı ordeni və vəsiqəni Prezident Vladimir Putinə təqdim etdi.

Sonra Rusiya Prezidenti VLADİMİR PUTİN çıxış edərək dedi:

- Zati-müqəddəsləri!

Əziz dostlar!

Mən yüksək mükafatı - Şeyxülislam ordenini minnətdarlıqla qəbul edirəm. Bunu müxtəlif dinlər arasında və ən müxtəlif dinlərə etiqad edən insanlar arasında münasibətlər yaradılması işində Rusiyanın yüksək rolunun tanınması kimi, mədəniyyətlərin dialoquna və Cənubi Qafqaz regionunda sabitliyin möhkəmlənməsinə kömək göstərilməsində Rusiyanın yüksək rolunun tanınması kimi qiymətləndirirəm.

Rusiya Federasiyası dünyəvi dövlətdir. Burada əsrlərdən bəri ən müxtəlif millətlərə və dinlərə mənsub adamlar yaşayırlar, həmrəylik şəraitində yaşayır və bir-birinin əqidələrinə hörmət edirlər. Rusiyada biz dinə hörmət və ən müxtəlif dini əqidə və baxışları olan adamlara tolerant müasibət ənənələrinə rəğbət bəsləyirik. Belə yanaşmanı təkcə daxili siyasi işlərdə deyil, həm də xarici aləmdə, xüsusən də tarixi irsin mürəkkəb, bəzən dramatik yükündən dini və xalqlararası münaqişələrin qızışdırılması üçün istifadə edildiyi regionlardan söhbət getdikdə son dərəcə mühüm sayırıq.

Bununla əlaqədar biz regionda konfessiyalararası əməkdaşlıq ab-havası yaradılması sahəsində Azərbaycan Respublikası rəhbərliyinin səylərini və müsəlman liderlərinin çox çətin işini yüksək qiymətləndiririk. Biz dini ekstremizm və terrorizm təzahürlərinə qarşı qəti mövqe tutulmasını qiymətləndiririk.

Bilirsiniz ki, Rusiya indi bu məsələdə tərəfdaşlarla, o cümlədən bir çox müsəlman ölkələri ilə beynəlxalq aləmdə, ölkəmizin daimi əsasda müşahidəçi qismində yekdilliklə qəbul olunduğu İslam Konfransı Təşkilatı çərçivəsində aktiv qarşılıqlı fəaliyyət göstərir. Müasir dövrdə bütün konfessiyalar üçün ümumi olan əxlaqi və mənəvi dəyərlərin möhkəmləndirilməsini vacib sayıram. Yaxşılığa və haqq-ədalətə inam, mərhəmət və sülhsevərlik bütün böyük dünya dinlərinin baza postulatlarını təşkil edir. Odur ki, biz dinlərarası və millətlərarası dialoqun möhkəmlənməsinə yönəldilmiş siyasəti hər vasitə ilə dəstəkləyirik.

Bu baxımdan Rusiya Pravoslav Kilsəsinin başçısı II Aleksinin din liderlərinin Ümumdünya zirvə toplantısını cari il iyulun 4-5-də Moskvada keçirmək təşəbbüsünü də alqışlayırıq. Məlumdur ki, bütün dinlər başqa dini etiqadlardan olan xalqlarla qarşılıqlı anlaşmaya istiqamətlər verir. Müqəddəs Quran isə xeyir və nəciblikdə əməkdaşlıq etməyə, şərə və düşmənçiliyə kömək etməməyə bilavasitə çağırır.

Ona görə də dindarların hisslərinin hər hansı şəkildə təhqir olunmasını yolverilməz, hüquqazidd hesab edirik. Bu son dərəcə həssas məsələlərdə çox diqqətli olmaq, nəinki əməllərin, hətta düşünülməmiş sözlərin nə kimi ağır nəticələrə gətirib çıxara biləcəyini əvvəlcədən proqnozlaşdırmağı bacarmaq lazımdır. Mən hələ dövlət orqanlarının işini demirəm, onların hərəkətləri üçqat məsuliyyətli olmalıdır. Bunu Azərbaycanın tanınmış ümummilli lideri Heydər Əliyeviç Əliyev yaxşı bilirdi. Ən münaqişəli dövrlərdə məhz onun sayəsində dini dözümlülük prinsipi Azərbaycanın siyasətində təməl daşı olaraq qalmışdır. Düşünürəm ki, buna, habelə əsası Heydər Əliyeviç Əliyev tərəfindən qoyulmuş digər prinsiplərə sadiqlik, qəti əməl olunması bu gün, indiki şəraitdə də Azərbaycana səmərəli surətdə inkişaf etməyə və irəliləməyə kömək edən əsaslardan biridir.

Sonda bir daha vurğulamaq istəyirəm ki, regionda bir çox vəzifələrin həllinin açarı məhz dinlərarası dialoqda, onun dinlərin zəngin sülhyaratma potensialına əsaslanan müvəffəqiyyətindədir. Ona görə də biz müsəlman ruhanilərinin nüfuzlu nümayəndələrinin, Azərbaycanda, ümumiyyətlə, regionda fəaliyyət göstərən və işləyən digər konfessiyaların nümayəndələrinin köməyinə çox ümid bəsləyirik. Bu regionun xalqları qarşısında duran bütün mürəkkəb məsələlərin həllində sizin dəstəyinizə çox ümid bəsləyirik.

Göstərdiyinz şərəfə görə çox sağ olun.

X X X

Sonra çay süfrəsi arxasında söhbət oldu.

Ordenin təqdim olunması mərasimində Qafqaz Müsəlmanları İdarəsi Elmi-Dini Şurasının üzvləri, dini liderlər iştirak edirdilər.