RUSİYA İRAQA HƏRBİ QULLUQÇULAR GÖNDƏRMƏK FİKRİNDƏ DEYİL
Rusiya öz hərbi qulluqçularını sülhməramlı qüvvələr kimi İraqa göndərmək fikrində deyildir. Bunu iyulun 1-də RF müdafiə naziri Sergey İvanov Ukrayna hərbi idarəsinin başçısı Yevgeni Marçukla danışıqlardan sonra bəyan etmişdir. Nazir qeyd etmişdir ki, “Rusiyanın hərbi kontingenti sülhməramlı qüvvələr kimi dünyanın müxtəlif regionlarında iştirak edir, lakin bir şərtlə - BMT-nin mandatı olduğu təqdirdə”. İTAR-TASS-ın verdiyi xəbərə görə, Rusiya naziri İraqda vəziyyətin həddindən artıq mürəkkəb olduğunu bildirmişdir. O demişdir: “İraqda vəziyyət normal haldan çox uzaqdır. Zənnimizcə, İraqda vəziyyətin normallaşmasına, ilk növbədə, BMT-nin səyləri kömək edə bilər”.
Bölmənin digər xəbərləri
