RUSİYA PREZİDENTİ VLADİMİR PUTİNİN NİTQİ
Hörmətli xanımlar və cənablar!
Əziz dostlar!
Biz dövlətlərarası münasibətlərin, Azərbaycan və Rusiya Federasiyası arasında münasibətlərin inkişafının müasir mərhələsi üçün həqiqətən, əlamətdar və çox mühüm olan hadisənin iştirakçılarıyıq. Bu gün biz Azərbaycan Respublikasında Rusiyanın milli İlinə start veririk. O, Rusiyanın müasir, ən yeni nailiyyətlərinə sadəcə baxış olmayıb, tarixən yaxın dövlətlərin və xalqların bərabərhüquqlu və qarşılıqlı surətdə faydalı əməkdaşlığına yeni təkan verməlidir. Elə xalqların ki, onlar əsrlər boyu münasibətlərində olan yaxşı varisliyi qayğı ilə qoruyub saxlayaraq, bu ənənələri nəsildən-nəslə ötürmüşlər.
Şübhəsiz, İlin proqramı Rusiya Federasiyasında Azərbaycan İlindən heç də az populyar və önəmsiz olmayacaqdır. Rusiyada Azərbaycan İli isə göstərmişdir ki, xalqlarımızın taleləri nə dərəcədə sıx tellərlə bağlanmış və onların sülh, əmin-amanlıq şəraitində yaşamağa, əlbir qarşılıqlı inkişafa, bir-birini zənginləşdirməyə kömək etməyə çalışmaq əzmi nə qədər güclüdür. Burada təəccüblü heç nə yoxdur. Axı, epoxalar boyu ruslar və azərbaycanlılar bir-birini anlamaq üçün böyük qabiliyyətə, bu dərəcədə özgür mədəniyyətlərin mənəvi dəyərlərini əxz etməyə, milli və konfessiyalararası münasibətlərdə misilsiz qarşılıqlı hörmət və dözümlülük təcrübəsini qoruyub saxlamağa qadir olduqlarını göstərmişlər.
Biz vüsətli iqtisadi vəzifələrin birlikdə həllində də çox nailiyyətlər əldə etmişik. Bu, həm də Xəzərdə neft mədənlərinin yaradılması və Sibir yataqlarının işlənilməsidir. Vaxtilə Rusiya geoloqu İvan Mixayloviç Qubkinin elmi axtarışları Azərbaycanda yeni “qara qızıl” yataqları kəşf etməyə imkan vermişdir. Bakının neft universitetləri isə yüz minlərlə rusiyalı mütəxəssis hazırlamışdır və onlar indi də bu sahədə işləyirlər.
Böyük Vətən müharibəsi illərindəki döyüş qardaşlığımız xalqların dünya tarixində görünməmiş birliyinin nümunəsi olmuşdur. Fürsətdən istifadə edərək, nasizm üzərində Böyük Qələbənin 60 illiyi şərəfinə genişmiqyaslı tədbirlərin hazırlanması və keçirilməsində həmrəyliyə görə Azərbaycan Respublikasının Prezidentinə, Azərbaycanın bütün veteranlarına təşəkkürümü bildirmək istəyirəm.
Əməkdaşlığın belə əsaslı, zamanın sınağından çıxmış bünövrəsi, ümumi tarixə hörmət Rusiya və Azərbaycan xalqlarını yeni şəraitdə də birləşdirir. Bu gün dövlətlərimizin quruculuq sahəsində nümayiş etdirdikləri uğurlar isə elə bir perspektivli bazadır ki, biz müasir tərəfdaşlığımızı onun üzərində qururuq. Onu da unutmaq olmaz ki, bizim münasibətlərimizin müsbət xarakteri bütün regionda coğrafi-siyasi sabitlik amilidir. Burada biz kooperasiyanın yeni, səmərəli modellərini hələ axtarmalı və birlikdə həyata keçirməli, təkcə ikitərəfli imkanlardan deyil, həm də postsovet məkanındakı inteqrasiya proseslərindən tam dolğunluğu ilə istifadə etməliyik.
Əziz dostlar!
Rusiya və Azərbaycanın bir çox vətəndaşları ümumi işlə, möhkəm ailə və dostluq telləri ilə bağlıdırlar. Odur ki, biz hamımız vahid humanitar məkanın qorunub saxlanması və möhkəmlənməsində, mədəni əlaqələrin, gənclər mübadiləsinin inkişafında, elm və təhsil sahəsində təmaslarımızın genişlənməsində bilavasitə maraqlıyıq. MDB dövlətlərinin humanitar əməkdaşlıq haqqında Kazanda imzalanmış Sazişi də məhz buna yönəlmişdir. Əminəm ki, humanitar əməkdaşlığın çoxtərəfli formatı bu sahədə ikitərəfli əlaqələrin imkanlarını tamamlayır və genişləndirir.
Bax, buna görə də həmin sazişin ideyasına tələbat olmuş və Birlik ölkələrinin yaradıcı və elmi ziyalıları onu dəstəkləmişlər. Onlar artıq bu ilin yazında Moskvada özlərinin ilk forumunu keçirməyi təklif etmişlər. Əminəm ki, belə qeyri-adi, məzmunlu tədbir birgə humanitar layihələr üçün, MDB məkanında ümumi, təzələnmiş bazarlar – təhsil, elmi, mədəni xidmətlər bazarlarının açılması üçün, Birliyin bütün ölkələrində insan kapitalının inkişafı üçün çıxış nöqtəsi olacaqdır.
Əziz dostlar!
Azərbaycanda rus dilinin necə geniş yayıldığını, rus ədəbiyyatına necə böyük maraq olduğunu yaxşı bilirəm. Düşünürəm ki, Bakıda tezliklə keçiriləcək rus kitabı birinci beynəlxalq festivalı Azərbaycanda Rusiya İlinin ən əlamətdar hadisələrindən birinə çevriləcəkdir. Bununla əlaqədar görkəmli Rusiya filoloqu və maarifçisi, bu il 100 illiyini qeyd edəcəyimiz Dmitri Sergeyeviç Lixaçovun sözlərini misal gətirmək yerinə düşərdi. O, millətlərin mənəvi və əxlaqi əsaslarını möhkəmlədən öz keçmişinə müraciətin vacibliyindən danışarkən vurğulamışdır ki, “əgər keçmişə belə müraciət digər xalqlardan və onların mədəni təcrübəsindən təcrid olunmaq kimi məhdud niyyətdən irəli gəlibsə, bu müraciət səmərə verə bilməz”. Milli mədəniyyətləri zənginləşdirən və genişləndirən bu açıqlıq ideyası Azərbaycanda Rusiya İlinin ruhu ilə tam ahəngdar səslənir.
Bu gün onun başlandığını təntənəli surətdə elan edərək, bu bayramın bütün rusiyalı və azərbaycanlı iştirakçılarına uğurlar diləmək və ən xoş arzularımı bildirmək istəyirəm.
Diqqətinizə görə çox sağ olun.
Bölmənin digər xəbərləri
