Sağlamlıq imkanları məhdud şəxslərin inklüziv təhsili ilə bağlı müzakirələr aparılıb
Bakı, 2 mart, AZƏRTAC
Təhsil Nazirliyində “Sağlamlıq imkanları məhdud şəxslərin həyata və təhsil mühitinə inteqrasiyasını təmin edən inklüziv təlim metodologiyasının yaradılması” mövzusunda maarifçi QHT-lərlə görüş keçirilib.
AZƏRTAC xəbər verir ki, tədbirdə sağlamlıq imkanları məhdud şəxslərin inkişafı və inklüziv təhsili ilə bağlı proqramın hazırlanmasında maraqlı tərəflərin təklifləri müzakirə edilib.
Tədbirdə Təhsil Nazirliyinin informasiya şöbəsinin əməkdaşı Elçin Sərdarovun “Maarifçi QHT-lərin inklüziv təhsildə təcrübəsi və yeni imkanları“, de-institutlaşma və uşaqların müdafiəsi idarəsinin şöbə müdiri Anar Xələfovun “İnklüziv təhsil: pilot məktəb təcrübəsi”, Əlil Təşkilatları İttifaqının prezidenti Davud Rəhimlinin “İnklüziv təhsil - hüquqi əsaslar, mövcud vəziyyət və problemlər” və Hemofiliya Xəstələrinin Respublika Assosiasiyasının sədri Gülnarə Hüseynovanın “Fiziki məhdudiyyətli olan uşaqların təhsil mühitinə inteqrasiyası və inkişaflarına dəstək” mövzusunda məruzələri dinlənilib.
Həmçinin proqramın hazırlanması ilə bağlı səslənən təkliflərdə inklüziv təhsil sahəsində cəmiyyətdə maarifləndirmə işinin daha da gücləndirilməsi, xüsusi ehtiyaclar üçün təhsil müəssisələrinin münasib infrastrukturlarla təmin edilməsi, inklüziv təhsil siniflərinin yardımçı avadanlıq və müxtəlif vəsaitlərlə təchizatı və bu kimi məsələlər əksini tapıb.
Bölmənin digər xəbərləri
