SAHİBKARLIĞIN İNFORMASİYA TƏMİNATI GÜCLƏNİR
İqtisadi İnkişaf Nazirliyindən AZƏRTAC-a bildirmişlər ki, ötən müddətdə sahibkarların təşəbbüskarlığının və hüquqi biliklərinin artırılması, informasiya və məsləhət təminatının gücləndirilməsi, yeni iqtisadi şəraitdə iş təcrübəsinin mənimsənilməsi və artırılmasına istiqamətlənmiş kompleks tədbirlər görülmüşdür və bu iş davam etdirilir. Aparılmış təhlillər göstərir ki, yaranan problemlərin əksəriyyəti sahibkarlıq subyektlərinin işgüzar fəaliyyətə dair biliklərinin və biznes mədəniyyətinin lazımi səviyyədə olmamasından irəli gəlir. Bu tələbatı ödəmək məqsədi ilə sahibkarlar üçün məsləhət, marketinq xidmətləri, informasiya təminatı, təlim və digər xidmətləri sistemli həyata keçirəcək regional şəbəkəyə malik Biznes Tədris Mərkəzi, onun Şəki regional bölməsi fəaliyyət göstərir. Digər regional bölmələrin yaradılması istiqamətində tədbirlər görülür.
Sahibkarlıq subyektləri üçün informasiya məcmuələrinin nəşri sahəsində biznes-planların tərtibi ilə bağlı, normativ-hüquqi sənədlərə dair məlumat kitabçaları, “Sahibkarlığın hüquqi əsasları” silsiləsindən bir neçə kitab çap edilmiş və sahibkarlara paylanmışdır.
İnformasiya təminatı sahəsində operativ əlaqə vasitələrinin imkanlarından da istifadə edilir.
Bölmənin digər xəbərləri
