Şalva Papuaşvili: Gürcüstan Prezidentinin andiçmə mərasiminə xarici ölkələrin səfirləri dəvət edilmir
Tbilisi, 26 dekabr, AZƏRTAC
Seçicilər Kollegiyası tərəfindən seçilən Gürcüstan Prezidenti Mixail Kavelaşvilinin andiçmə mərasiminə xarici ölkələrin səfirləri dəvət edilmir.
AZƏRTAC xəbər verir ki, bu barədə Gürcüstan parlamentinin sədri Şalva Papuaşvili bildirib.
Onun sözlərinə görə, andiçmə mərasiminə xarici ölkələrin nümayəndələrinin dəvət edilməsi nəzərdə tutulmayıb.
“Səfirlər dəvət olunmur. İnauqurasiyaya xarici ölkələrin nümayəndələrini dəvət etməyi belə düşünmürdüm. Eyni zamanda, əlbəttə ki, zalın müəyyən məhdudiyyətləri var, lakin bu, əsas şey deyil. Əsas odur ki, bu, rəsmi mərasimdir, orada kollegiya üzvlərinin özləri iştirak etməli, konstitusiya orqanları da tam şəkildə təmsil olunmalıdır”, - deyə Papuaşvili bildirib.
Qeyd edək ki, Mixeil Kavelaşvilinin andiçmə mərasimi dekabrın 29-da Gürcüstan parlamentinin iclas zalında baş tutacaq.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
