Samir Barhum: Multikulturalizmin Azərbaycan modeli dünya ölkələrinin çoxuna örnəkdir
Əmman, 11 may, AZƏRTAC
Bu yaxınlarda Bakıda keçirilən BMT-nin Sivilizasiyalar Alyansının VII Qlobal Forumu sivilizasiyalararası və mədəniyyətlərarası dialoqun möhkəmlənməsində böyük rol oynayır. Forum çox yüksək səviyyədə təşkil edilmişdi. Bu sözləri forumun iştirakçısı, İordaniyada çıxan gündəlik ingilisdilli “Jordan Times” qəzetinin baş redaktoru Samir Barhum AZƏRTAC-ın xüsusi müxbirinə eksklüziv müsahibəsində söyləyib.
Samir Barhum qeyd edib ki, forumda dünya liderləri, tanınmış siyasətçilər və aparıcı ölkələrdən ekspertlər iştirak edib. Forumda müasir dövrün aktual problemləri, o cümlədən sülh və təhlükəsizlik, insan hüquqları, qanunun aliliyi və inkişaf, ekstremizmin və terrorizmin aradan qaldırılması məsələləri müzakirə edilib.
S.Barhum deyib: ”Ekstremizmə və terrorizmə qarşı mübarizədə beynəlxalq səyləri millətlərarası, mədəniyyətlərarası və dinlərarası dialoqu və qarşılıqlı fəaliyyəti yoluna qoymaq vasitəsilə fəallaşdırmağın vacibliyinə xüsusi diqqət yetirilib. Dünya gündəliyinin mühüm məsələlərinin, o cümlədən regional problemlərin müzakirəsi zamanı müasir çağırışlara və təhdidlərə qarşı mübarizə aparmaq üçün möhkəm dialoq körpüləri yaratmaqdan ötrü dünya ölkələri arasında BMT-nin dəyər sisteminə uyğun daha sıx əməkdaşlığın möhkəmlənməsinin əhəmiyyəti vurğulanıb. Bakıda keçirilən qlobal forum gələcək üçün möhtəşəm planların qurulacağı əlverişli təməldir. Maraqlıdır ki, forum maraqlı ünsiyyət və əlaqələr qurmaq, dünya liderlərinin və başqa iştirakçıların ideyalarını öyrənmək, aktual məsələlərə dair fikir mübadiləsi aparmaq üçün gözəl platformadır”.
Azərbaycan Prezidenti İlham Əliyevin açılış mərasimində çıxışına toxunan Samir Barhum bildirib ki, Azərbaycan dövlətinin başçısı parlaq və maraqlı çıxış etdi. O, ölkənin siyasətindən, qədim Azərbaycan sivilizasiyasından, dərin tarixi-mədəni dəyərlərdən, o cümlədən böyük multikulturalizm və tolerantlıq təcrübəsindən danışaraq vurğulayıb ki, Azərbaycanda multikulturalizm və dini dözümlülük dövlət siyasətidir. S.Barhum deyib: “Zənnimcə, Prezidentin informasiya xarakterli və ətraflı çıxışı forumun gündəliyinin bütün mühüm məsələlərini əhatə etdi”.
S.Barhumun fikrincə, Bakıda VII Forumun keçirilməsi qanunauyğundur, çünki Azərbaycan zəngin multikulturalizm və tolerantlıq ənənəsinə malikdir, dünyəvi və plüralist dövlətdir. Burada müxtəlif dinlərin və mədəniyyətlərin nümayəndələri sülh və əmin-amanlıq şəraitində yaşayırlar. O deyib: “Şərq ilə Qərb arasında körpü olan Azərbaycan sivilizasiyalararası və mədəniyyətlərarası dialoqun möhkəmlənməsində aparıcı rol oynayır. Bu gün Azərbaycan regionun və dünyanın bir çox ölkələri üçün örnək olan multikulturalizm modelinə malik müasir dövlətdir”.
Azərbaycanın yürütdüyü siyasətdən danışan S.Barhum bildirib ki, Azərbaycan bütün sahələrdə, o cümlədən multikulturalizm sahəsində Prezident İlham Əliyevin rəhbərliyi ilə müdrik və ölçülüb-biçilmiş siyasət yürüdür. O deyib: “Bu siyasət sayəsində Azərbaycan təkcə ölkədə deyil, həm də beynəlxalq səviyyədə mədəniyyətlərarası, dinlərarası münasibətlərə sanballı töhfə verir. Azərbaycan müstəqilliyini bərpa edəndən sonra sürətlə tərəqqi edir. Son illər ölkə sanballı uğurlara nail olub.
Bakı haqqında təəssüratlarını bölüşən Samir Barhum bildirib ki, Bakının dünyanın ən gözəl şəhərlərindən biri olması onu yaxşı mənada təəccübləndirib. Baş redaktor deyib: “Bu şəhər özündə qədimliyi və müasirliyi birləşdirən çox gözəl paytaxtdır. Bakı bulvarı, bütün dəniz sahili boyu və başqa yerlərdə salınmış gözəl parklar, ekzotik ağaclar və bitkilər böyük təəssürat yaradır. Əlqərəz, vətəndaşların yaxşı əylənməsi və istirahət etməsi üçün hər cür şərait yaradılıb. Çoxsaylı böyük və müasir ticarət-əyləncə mərkəzləri də diqqəti cəlb edir. Bakıda infrastruktur çox inkişaf edib. Mən bütün istiqamətlərdə tərəqqi və inkişaf müşahidə etdim. Qonaqlarına qayğıkeş münasibət bəsləyən, qardaş Azərbaycan xalqının əsl qonaqpərvərliyini və həqiqi xarakterini nümayiş etdirən paytaxt sakinlərinin böyük səmimiyyətini xüsusi vurğulamaq istəyirəm”.
Samir Barhum ikitərəfli Azərbaycan-İordaniya münasibətlərinə toxunaraq vurğulayıb ki, ölkələrimizin qarşılıqlı fəaliyyət üçün böyük potensialı var. Bu potensialdan tam istifadə olunmalıdır. Ölkələrimizi və xalqlarımızı dostluq münasibətləri bağlayır. Bir çox siyasi, beynəlxalq və regional məsələlərə dair qarşılıqlı anlaşma var.
Asya Hacızadə
AZƏRTAC-ın xüsusi müxbiri
Əmman
Bölmənin digər xəbərləri
