İDMAN
“Səbail”in kapitanı: Cavid Hüseynovla komandaya yeni nəfəs gələcək
Bakı, 13 noyabr, AZƏRTAC
“Çalışırıq ki, çempionatda ürəkaçan olmayan nəticələrimizi düzəldək. Buna görə də Şahin Diniyev istefa verdi və Cavid Hüseynov yeni baş məşqçi təyin olundu”.
Bu sözləri AZƏRTAC-a açıqlamasında “Səbail”in futbolçusu Yusif Nəbiyev komandanın bu mövsümkü çıxışı və baş məşqçi dəyişikliyi ilə bağlı danışarkən deyib.
Kapitan uğursuzluğun əsas səbəbini yeni futbolçuların komandaya tam adaptasiya olmaması ilə əlaqələndirib: “Heyətdəki yerli və əcnəbi oyunçuların zəif olduğunu desək, düzgün çıxmaz. Çünki bütün oyunçularımız keyfiyyətli və bacarıqlıdır. Sadəcə, özünəinamı qaytarmaq lazımdır. İndiki durumda hansısa hədəfdən danışmaq tezdir. Xal ehtiyatımız çox azdır. Qarşıdakı görüşlərdə nəticələr qazanaraq, yüksək yerlərə qalxmaq istəyirik. Baş məşqçi postuna gənc, perspektivli Cavid Hüseynov gətirildi. Futbolçu kimi çox yaxşı karyerası olub. “Səbail”dən əvvəl isə bəzi klublarda məşqçi kimi fəaliyyət göstərib”.
Şahin Diniyevin istefasına da toxunan 28 yaşlı müdafiəçi futbolda bu cür uğursuzluqların yaşana biləcəyini söyləyib: “Şahin Diniyev yaxşı nəticələr qazanmağımız üçün çox çalışdı. Sonda isə öz böyüklüyünü göstərərək istefa verdi. Kaş, belə olmazdı. Məşqçi və futbolçular bir klubda daimi olaraq qalmırlar. Bu gün burada, sabah başqa yerdəsən. İndi komandaya yeni nəfəs gələcək. İnanıram ki, gələcək matçlarda istədiyimiz nəticələri əldə edə biləcəyik”.
Qeyd edək ki, 13 turdan sonra 8 xal toplayan “Səbail” turnir cədvəlinin 9-cu pilləsində qərarlaşıb.
