Şəkidə Xalq şairi Bəxtiyar Vahabzadənin 100 illiyi qeyd olunub VİDEO
Şəki, 18 may, Mustafa Dadaşov, AZƏRTAC
Xalq şairi Bəxtiyar Vahabzadə öz dəyərli əsərləri ilə müasir Azərbaycan ədəbiyyatının inkişafında çox böyük xidmətlər göstərib. Şairin mübariz qələmi bütün dövrlərdə onun saf məslək və əqidəsinə xidmət edib. Bəxtiyar Vahabzadə nəinki Azərbaycanın, eləcə də bütün Türk dünyasının ən qüdrətli söz ustalarından biri olub. Onun əsərləri Azərbaycanda olduğu kimi, Türkiyədə də, türkdilli ölkələrdə də sevə-sevə oxunur.
AZƏRTAC-ın bölgə müxbiri xəbər verir ki, bu fikirlər Azərbaycan Milli Elmlər Akademiyasının (AMEA) və Mahmud Kaşqari adına Beynəlxalq Fondun birgə təşkilatçılığı ilə mayın 18-də Şəki şəhərində keçirilən unudulmaz Xalq şairi, müasir Azərbaycan ədəbiyyatının görkəmli nümayəndəsi Bəxtiyar Vahabzadənin anadan olmasının 100 illiyinə həsr olunmuş konfransda səsləndirilib.
Tədbirdə AMEA-nın, Şəki Şəhər İcra Hakimiyyətinin rəsmiləri, Türkiyənin, türkdilli ölkələrin Azərbaycandakı səfirləri, TÜRKPA, TÜRKSOY, Türk Mədəni İrsi Fondu və digər təşkilatların nümayəndələri, Milli Məclisin deputatları, elm adamları, ziyalılar iştirak ediblər.
Konfrans iştirakçıları əvvəlcə Ümummilli Liderin abidəsi önünə gül dəstələri düzüb, xatirəsinə ehtiramlarını bildirib, tədbirin keçirildiyi Heydər Əliyev Mərkəzi ilə tanış olublar.
Konfransda Şəki Şəhər İcra Hakimiyyətinin başçısı Elxan Usubov çıxış edərək, Prezident İlham Əliyevin Xalq şairi Bəxtiyar Vahabzadənin 100 illik yubileyinin qeyd edilməsi haqqında Sərəncamına uyğun olaraq Şəki şəhərində silsilə tədbirlərin keçirildiyini bildirib. Qeyd olunub ki, böyük söz ustası Bəxtiyar Vahabzadə yüz illər boyu formalaşmış yüksək milli-mənəvi dəyərlərimizin qorunması və yaşadılması naminə gözəl əsərlər yaradıb. O, çoxsaylı əsərləri ilə ədəbiyyatımızın inkişafına böyük töhfələr verib. Baxtiyar Vahabzadə özündən əvvəlki böyük ədib və şairlərin işlərini uğurla davam etdirib. İcra başçısı çıxışında Bəxtiyar Vahabzadənin bir alim kimi də Azərbaycan elmi qarşısındakı xidmətlərinin danılmaz olduğunu, əsərlərinin daim elmi ictimaiyyət tərəfindən maraqla qarşılandığını vurğulayıb.
Sonra Bəxtiyar Vahabzadəyə həsr olunan filmin təqdimatı olub.
Konfransda çıxış edən AMEA-nın prezidenti İsa Həbibbəyli Şəkinin Azərbaycan tarixinə, mədəniyyətinə, ədəbiyyatına böyük şəxsiyyətlər bəxş etdiyini bildirib. Vurğulanıb ki, bu gün Azərbaycanın böyük mütəfəkkir şairi Bəxtiyar Vahabzadənin yubileyini qeyd edərkən Şəkidə ədəbiyyat, mədəniyyət, ictimai fikir üçün böyük ənənələr yaratmış Mirzə Fətəli Axundzadə, Rəşid bəy Əfəndiyev, Sabit Rəhman, Emin Sabitoğlu, Şirməmməd Hüseynov və onlarla başqalarını xatırlamağı özümüzə borc bilirik.
AMEA-nın prezidenti deyib: “Bəxtiyar Vahabzadə ədəbiyyata çox səlis, Şəkinin havası qədər təmiz, bulaqları qədər saf lirik şeirlərlə gəlib. Onun 50 ildən artıq davam edən yaradıcılığı Azərbaycan xalqının milli mənəvi özünüdərkinə, azərbaycançılıq ideyalarına, xalqımızın azadlığına, bütövlüyünə, milli istiqlalına və Türk dünyasının birliyi uğrunda mübarizəyə həsr olunub. Şairin milli düşüncəsi azərbaycançılıq ideyalarından inkişaf edərək, ümumtürk düşüncəsi səviyyəsinə ədəbiyyatda qaldırılıb. Buna görədir ki, dünyanın böyük sənətkarlarından biri olan Çingiz Aytmatov Bəxtiyar Vahabzadəni milli təfəkkürə malik olan mütəfəkkir şair kimi yüksək qiymətləndirib”.
Milli Məclisin deputatı, Mahmud Kaşqari adına Beynəlxalq Fondun prezidenti Cavanşir Feyziyev çıxışında Bəxtiyar Vahabzadənin Azərbaycanın, eləcə də bütün Türk dünyasının ən sevimli, bəxtiyar şairlərindən biri olduğunu bildirib. Vurğulayıb ki, Bəxtiyar Vahabzadə öz yaradıcılığı, düşüncəsi ilə milyonlarla insanın qəlbinə yol tapa bilib, onların ürəyində özünə məhəbbət, sevgi qazanıb.
Konfransda çıxış edən Türkiyənin Azərbaycandakı səfiri Birol Akgün deyib: “Bəxtiyar Vahabzadə sadəcə Azərbaycan xalqının deyil, eyni zamanda, bütün Türk dünyasının qəlbində özünə yer etmiş, əsərləri, şeirləri, düşüncələri ilə millətimizin müştərək hafizəsində silinməz izlər buraxmış böyük bir şairdir. Onun şeirlərində Vətən, millət, hürriyyət, insan haqları və milli kimlik məsələləri həmişə önə çəkilib”.
Qazaxıstanın ölkəmizdəki səfiri Alim Bayel bildirib ki, Bəxtiyar Vahabzadənin yaradıcılığında milli ruh, insanlıq dəyərləri, azadlıq ideyaları, Vətənə, tarixə bağlılıq daima ön planda olub. O, təkcə bir şair olaraq deyil, vətəndaşlıq mövqeyinə sahib bir insan kimi də yaddaşımızda dərin iz qoyub.
Konfransda Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov, Əmək və sosial siyasət komitəsinin sədri Musa Quliyev, Türk Mədəniyyəti və İrsi Fondunun prezidenti Aktoti Raimkulova, TÜRKSOY-un Baş katibi, Qırğızıstan Respublikasının Xalq yazıçısı Sultan Raev, AMEA-nın Nəsimi adına Dilçilik İnstitutunun direktoru Nadir Məmmədli, TÜRKPA-nın Baş katibi Mehmet Süreyya Er, Qırğızıstan Respublikasının ölkəmizdəki səfiri Maksat Mamitkanov, Şimali Kıbrıs Türk Cümhuriyyətinin təmsilçisi Ufuk Turqaner çıxış edərək Bəxtiyar Vahabzadənin yaradıcılığından geniş söz açıblar.
Bəxtiyar Vahabzadənin qızı Gülzar Vahabzadə konfransın təşkilatçılarına təşəkkürünü bildirib.
Tədbir çərçivəsində TÜRKSOY-un Baş katibi Sultan Raevə AMEA-nın fəxri professoru titulu və Kaşqari medalı təqdim olunub.
Konfrans Şəki-Zaqatala Regional Mədəniyyət İdarəsinin hazırladığı konsert proqramı ilə başa çatıb.
Bölmənin digər xəbərləri
