İnşaatçılar, tikinti şirkətlərinin nümayəndələri və sakinlər dövlətimizin başçısını və xanımını səmimiyyətlə, gül-çiçəklə qarşıladılar.

Nəqliyyat Nazirliyinin “Yolnəqliyyatservis” departamentinin sədri, Milli Məclisin deputatı Cavid Qurbanov avtomobil yolunun göstəriciləri barədə dövlətimizin başçısına məlumat verdi. Bildirildi ki, Dünya Bankının ayırdığı kredit hesabına çəkilən 2-ci texniki dərəcəli yolun örtüyü, əsasən asfalt-betondur. Yolun hərəkət hissəsinin eni 7,5 metrdir. 9 yeni körpü, 14 keçid salınmışdır. Layihə üzrə görülən işlərə 31,6 milyon ABŞ dolları xərclənmişdir. 603 min kubmetr çınqıl, 1 milyon 617 min kubmetr torpaq işləri görülmüş, yüzlərlə insan işlə təmin olunmuşdur.

Yolun ümumi uzunluğu 94 kilometrdir, 21 kilometri ötən ilin fevral ayında təhvil verilmişdir. 2001-ci ildə ulu öndərimiz tərəfindən təsdiq edilmiş sazişə əsasən, 2011-ci ildən başlayaraq qaytarmaq şərti ilə 35 illik güzəştli kredit hesabına Azərbaycan və Almaniya şirkətləri tərəfindən həyata keçirilir.

İLHAM ƏLİYEV: Deməli, bu yol Qazağa qədər gedəcəkdir, Qazaxdan Gürcüstan sərhədinədək olan hissənin layihəsi ayrıca hazırlanmışdır?!

CAVİD QURBANOV: Cənab Prezident, bu hissə Yevlax-Gəncə yolu layihəsinə daxil edilmişdir.

İLHAM ƏLİYEV: Yevlax-Gəncə və Qazax-Gürcüstan sərhədi.

CAVİD QURBANOV: Bəli. Bu yolların yenidən bərpa edilməsi nəzərdə tutulmuşdur.

İLHAM ƏLİYEV: Yol enlidir. Baxmayaraq ki, zolaqlıdır, amma enlidir. Məncə, o zolaqlar adi zolaqlardan bir az enlidir.

CAVİD QURBANOV: Sizə məruzə etmişdik. Sizin razılığınızla yolu genişləndirib hərəkət hissəsinin enini 9 metrə çatdırdıq. Yolun yatağı isə 15 metrdir, ancaq 9 metr enində asfaltlanmışdır. Bəzi yerlərdə asfaltın qalınlığı 22-25 santimetrdir.

İLHAM ƏLİYEV: Yəni, bütün yük maşınlarının ağırlığına davam gətirəcəkdir.

CAVİD QURBANOV: Ümumiyyətlə, bu yol demək olar, intensiv şəraitdə tikilibdir. Son üzlük asfaltın döşənməsindən əvvəl burada maşınlar hərəkət edirdi. İnanıram ki, bu yol keyfiyyətlidir.

İLHAM ƏLİYEV: Çox yaxşı. İndi bütövlükdə Bakı-Gürcüstan sərhədi yolunun tikintisi nə vəziyyətdədir, başqa hissələrdə işlər gedir, yoxsa yox?

CAVİD QURBANOV: Cənab Prezident, Hacıqabuldan Kürdəmirədək olan təxminən 86 kilometrlik məsafədə tikinti işləri gedir. Bu işi İtaliya və Azərbaycan şirkətləri görür. Sizin tapşırığınızla yol bütün şəhərlərdən kənar keçir. Ona görə də həmin hissədə yol 10 kilometr uzanmışdır.

İLHAM ƏLİYEV: Əlbəttə, magistral yol şəhərə girməməlidir. Kim istəyir, şəhərə başqa yolla gedə bilər.

CAVİD QURBANOV: Artıq Ucar-Yevlax arasındakı məsafənin çəkilişi ilə əlaqədər iştirakçı firmalar seçilibdir.

İLHAM ƏLİYEV: Hələ orada tikinti getmir?

CAVİD QURBANOV: Allah qoysa, bu ilin dekabrında başlanacaqdır.

İLHAM ƏLİYEV: Yevlax-Gəncə layihəsinə isə yenidən baxacaqsınız.

CAVİD QURBANOV: Bəli, yenidən baxırıq, layihənin icrasına gələn ilin fevral-mart aylarında başlanacaqdır.

İLHAM ƏLİYEV: Elə edin ki, eni kifayət qədər olsun. Bütövlükdə, gələcəkdə ikizolaqlı yolu gərək genişləndirək. O vaxt layihə hazırlananda, nədənsə, Bakı-Hacıqabul yolu dördzolaqlı, Hacıqabul-Gürcüstan sərhədi ikizolaqlı nəzərdə tutulurdu. Elədir?

CAVİD QURBANOV: Bəli.

İLHAM ƏLİYEV: İndi hərəkətin intensivliyi, yük daşımaları artır. Bəlkə də, gələcəkdə dördzolaqlı yol da bəs etməyəcəkdir. Gərək bunun üzərində də işləyək.

CAVİD QURBANOV: Sizin tapşırığınızla biz artıq bunun layihələşdirilməsi ilə məşğuluq. Nəqliyyat Nazirliyində bu məsələyə baxılır. Bütün yolboyu, yəni Bakıdan Qazaxadək olan 501 kilometrlik məsafənin ikinci zolağı yenidən işlənir.

İLHAM ƏLİYEV: Bəli, Bakıdan Hacıqabula qədər artıq bu var. Düzdür, Bakı-Ələt yolu hələ ki, bir az yubanır. O nədən yubanır? Axı bu, Bakıya ən yaxın olan hissədir.

CAVİD QURBANOV: Cənab Prezident, həmin yol əvvəllər ümummilli liderimizin tapşırığı ilə tikilmişdir və eni 50 metrdir. Onun təkcə bir zolağının eni 11 metrdir.

İLHAM ƏLİYEV: Bəli, çox genişdir.

CAVİD QURBANOV: Ancaq tikinti daxili investisiyanın hesabına olduğundan oraya pul ayrılmırdı. Sizin tapşırığınızla gələn il bu yol üçün 10 milyon manat ayrılmışdır.

İLHAM ƏLİYEV: Bu, kifayət edəcək?

CAVİD QURBANOV: Yəqin ki, kifayət edəcəkdir.

İLHAM ƏLİYEV: O yol da bu səviyyədə olmalıdır. Bundan aşağı səviyyədə olmamalıdır. Özü də Bakıya daha yaxındır. Bakıdan rayonlara gedən əsas yol oradandır. Səngəçal terminalına, ondan sonra başqa rayonlara - biri cənub, digəri qərb istiqamətinə ayrılır. Amma çalışın ki, o yol yaxşı vəziyyətdə, yüksək səviyyədə olsun. Ortada olan zolaq isə enlidir. Vaxtilə hansısa məqsədlər üçün belə tikilibdir. Bəlkə də oradan sovet vaxtında tank keçməli idi. O qala bilər və heç bir maneçilik törətmir.

CAVİD QURBANOV: Həmin yol 1980-ci illərdə tikilibdir. Biz hamımız Rafiq Xələfovun tələbələriyik. O vaxt ondan soruşmuşdum. Deyirdi ki, o yolun tikintisi ilə bağlı ulu öndər Heydər Əliyevə müraciət edəndə tapşırmışdı ki, yolu enli tikin. Çünki Bakıya yaxındır. Ulu öndər bunu uzaqgörənlik edib ehtiyat kimi enli tikdirmişdir.

İLHAM ƏLİYEV: İndi ortada olan torpaq zolağını da bəlkə yola qataq?

CAVİD QURBANOV: Cənab Prezident, mümkündür.

İLHAM ƏLİYEV: Bunu etsək, haradasa, 6 zolaqlı yol olacaqdır.

CAVİD QURBANOV: Bəli. Cənab Prezident, Sizin tapşırığınızla Bakı dairəvi yolunun layihəsi hazırlanıb, bir ay, ayyarımdan sonra tikintisinə başlanacaqdır. Həmin yol altızolaqlıdır. Əgər bu altızolaqlıdırsa, davamı kimi dördzolaqlı Ələt yolunu da ona bərabərləşdirmək olar.

İLHAM ƏLİYEV: Bəli, ortada olan torpaq hissəni yol etmək olar. İndi bizim bu qədər imkanımız var. Xüsusilə yol tikintisinə böyük vəsait ayrılır. Gələn il də nəzərdə tutulubdur. Yol Fondu da yaradılıbdır. Bizə imkan verəcək ki, bu işləri çevik şəkildə tənzimləyək.

X X X

Prezident İlham Əliyev rəmzi açılışı bildirən lenti kəsdi. İnşaatçılarla, tikintidə iştirak edən xarici və yerli şirkətlərin nümayəndələri ilə görüşüb, onları təbrik etdi. Dövlətimizin başçısı dedi:

- Azərbaycanda bütün yollar ən yüksək səviyyədə olmalıdır. Dünyada harada ən yüksək səviyyədə yol varsa, Azərbaycanda da o yoldan olmalıdır. Mənim tələbim budur. Yaxşı da iş görürsünüz. Mən görürəm, keyfiyyətlidir. Düzdür, bu yolun keyfiyyətini, bəlkə, 2-3 ildən sonra dəqiq biləcəyik. Əgər burada hər şey yaxşı olsa, mən sizi tapıb bir daha təşəkkürümü bildirəcəyəm. Əgər pis olsa, onda gərək gizlənəsiniz.

Dövlətimizin başçısı sonra inşaatçılarla xatirə şəkli çəkdirdi və avtomobili özü idarə edərək, yeni yolun açılışını etdi.