ELM VƏ TƏHSİL
ŞƏMKİRLİ İŞ ADAMLARI KƏNDDƏ MƏKTƏB TİKMİŞLƏR
Şəmkir rayonunun Şiştəpə kəndinin məktəbliləri builki Bilik gününü həmişə xatırlayacaqlar. Rayonun iş adamlarının vəsaiti ilə kənddə tikilmiş orta məktəb həmin gün öz qapılarını şagirdlərin üzünə açmışdır. Bu münasibətlə keçirilən mərasimdə çıxış edən rayon icra hakimiyyətinin başçısı Aslan Aslanov, respublika təhsil nazirinin müavini İsgəndər İsgəndərov, müəllimlər, kəndin ziyalıları bu xeyirxah işi görənlərə minnətdarlıqlarını bildirdilər.
Təxminən 300 min ABŞ dolları vəsait xərclənən, 22 sinif otağından ibarət olan, təzə avadanlıqla, o cümlədən 2 ədəd kompüterlə təmin edilən məktəb ən müasir tələblərə cavab verir. Yeni dərs ilinin başlanması ərəfəsində məktəbin ehtiyacları ilə maraqlanan iş adamları lazım olan bütün inventarları alıb gətirmişlər. İbtidai siniflərin şagirdləri dərs kitabları və məktəb ləvazimatları ilə təmin edilmişlər.
Mərasimdə vurğulanmışdır ki, bütün bunlar ölkədə yaradılmış ictimai-siyasi sabitliyin, iş adamlarına göstərilən qayğının nəticəsidir.