“Səngəçal” Elektrik Stansiyasının 30 faizdən çox “itirilmiş” gücü bərpa edilib
Bakı, 8 may, AZƏRTAC
“Azərenerji” ASC Bakı və Abşeron yarımadası da daxil olmaqla ölkənin enerji sistemində xüsusi rolu olan “Səngəçal” Elektrik Stansiyasında “itirilmiş” gücün bərpa edilməsi istiqamətində həyata keçirdiyi təmir-bərpa işlərini yekunlaşdırıb.
ASC-dən AZƏRTAC-a bildirilib ki, 2018-ci ilin payızında qəbul edilən “Reabilitasiya Proqramı”na qədər “Səngəçal” Elektrik Stansiyasında mövcud 18 aqreqatdan 4-ü ümumiyyətlə işləmirdi, qalan 14 aqreqat isə kəsirlə işləyirdi. Məhz işləməyən 4 aqreqatdan biri yenisi ilə əvəz edilib, digər aqreqatların isə əsas ehtiyat hissələri xarici ölkələrdən gətirilərək qurulub və işə qoşulub. Nəticədə 100 meqavata qədər “itirilmiş” güc bərpa edilib.
Bununla da qoyuluş gücü 300 meqavat olan “Səngəçal” Elektrik Stansiyasının üçdəbiri qədər gücü bərpa olunub. Müqayisə üçün qeyd edək ki, 100 meqavat güc orta hesabla respublikanın 4-5 rayonunun elektrik enerji tələbatına bərabərdir.
Qeyd edək ki, “Azərenerji” 12 elektrik stansiyasında yenidənqurma, təmir və bərpa işləri aparır ki, həmin elektrik stansiyalarından 6-sı məhz “Səngəçal” kimi modul tipli elektrik stansiyalarıdır. Bu günə qədər həmin 6 modul tipli elektrik stansiyalarında ümumilikdə 250 meqavatdan çox “itirilmiş” güc bərpa edilib. 2018-2021-ci illəri əhatə edən “Reabilitasiya Proqramı”na əsasən ümumilikdə 1000 meqavatdan çox “itirilmiş” gücün bərpa edilməsi ilə yanaşı, etibarlılıq və dayanıqlılığın təmin edilməsi qarşıya əsas məqsəd kimi qoyulub.
Bölmənin digər xəbərləri
