Şərqşünas alim beynəlxalq konfransda Seyid Yəhya Bakuvi və xəlvətilik barədə məruzə edib
Bakı, 17 sentyabr, AZƏRTAC
AMEA-nın akademik Ziya Bünyadov adına Şərqşünaslıq İnstitutunun direktor müavini dosent Elnur Mustafayev Ağdam şəhərində keçirilən Türk Dövlətləri Təşkilatının müsəlman dini rəhbərləri Şurasının 7-ci görüşü çərçivəsində azərbaycanlı mütəfəkkir Seyid Yəhya Bakuviyə həsr olunmuş beynəlxalq elmi konfransda “Seyid Yəhya Bakuvi və xəlvətilik: ümumbəşəri dəyərlərin Azərbaycan modeli” mövzusunda məruzə ilə çıxış edib.
İnstitutdan AZƏRTAC-a bildirilib ki, E.Mustafayev çıxışında azərbaycanlı alim və mütəfəkkirlərin İslam mədəniyyətinin və elmlərinin inkişafındakı müstəsna rolu, xüsusən fəlsəfə, məntiq, dilçilik və digər rasional elmlər üzrə ərsəyə gətirdiyi kitablar, o cümlədən onların dünyanın müxtəlif kitabxana və muzeylərində qorunan əlyazma əsərləri haqqında ətraflı məlumat verib.
Daha sonra Seyid Yəhya Bakuvinin Azərbaycan elmi-fəlsəfi fikrinin inkişaf etdirilməsi sahəsindəki fəaliyyəti, elmi ictimaiyyətə məlum olan 20-ə yaxın əsəri və bu əsərlərin məzmunu barəsində ətraflı məlumat konfrans iştirakçılarının diqqətinə çatdırılıb. Məruzədə Seyid Yəhya Bakuvinin Türkiyə Cümhuriyyəti Süleymaniyyə kitabxanasında mühafizə edilən “Şifaül-əsrar” əsərində qeyd edilən mənəvi kamilləşmə, ruhi tərbiyə, əxlaqi fəzilətlərin təsnifatı haqqında söhbət açılıb, Bakuvinin əks etdirdiyi ümumbəşəri dəyərlərin Azərbaycan modelinin səciyyəvi cəhətləri və elmi siqləti barəsində bəhs olunub.
Bölmənin digər xəbərləri
