SOFİYA VƏ VAŞİNQTON ƏMƏKDAŞLIQ HAQQINDA MÜQAVİLƏ İMZALAMIŞLAR

28.04.2006 [20:59]
Çap et
A⁺ A^-

AZƏRTAC İTAR-TASS-a istinadla xəbər verir ki, aprelin 28-də Sofiyada ABŞ-ın dövlət katibi Kondoliza Rays və Bolqarıstan Baş nazirinin müavini, xarici işlər naziri İvaylo Kalfin müdafiə sahəsində əməkdaşlıq haqqında müqavilə imzalamışlar.

Sənəddə ölkə ərazisində ABŞ hərbi bazalarının yerləşdirilməsi nəzərdə tutulur. Gözlənildiyinə görə, ilk amerikalı hərbçilər Bolqarıstana bu ilin sonunda, yaxud 2007-ci ilin əvvəlində gələcəklər.

Bazalar Bolqarıstanın yurisdiksiyası və komandanlığı altında olacaqdır.

Sənəd təminat verir ki, Amerika hərbi qulluqçularının istifadə edəcəkləri qurğularda kütləvi qırğın silahı yerləşdirilməyəcəkdir. Üçüncü ölkələrə zərbələr endirilməsi üçün bazalardan istifadə olunması haqqında qərar diplomatik kanallarla qarşılıqlı məsləhətləşmələrdən sonra qəbul edilə bilər.

10 il müddətinə nəzərdə tutulan müqavilə Bolqarıstan parlamenti tərəfindən ratifikasiya edildikdən sonra qüvvəyə minəcəkdir.