Somalidə fırtına qurbanlarının sayı artaraq 300 nəfərə çata bilər
Bakı, 14 noyabr (AZƏRTAC). Somalinin şimal-qərbindəki Puntlend regionunun ötən həftə üzləşdiyi fırtına qurbanlarının sayı artaraq 300 nəfərə çata bilər. Bu barədə məlumatı Röyter agentliyi yerli hakimiyyət orqanlarına istinadla yaymışdır.
Fırtına qurbanlarının sayını dəqiqləşdirən region hökumətinin daxili işlər naziri Əbdullahi Əhməd demişdir: “İndiyə qədər 140 adamın həlak olmasını təsdiq etmişik. Lakin qurbanların sayının artaraq 300 nəfərə çatmasından ehtiyat edirik, çünki bir çoxları əvvəlki kimi itkin düşmüş sayılır”.
Daha əvvəl təbii fəlakət nəticəsində 100 nəfərin həlak olması barədə məlumat verilmişdi.
Fövqəladə vəziyyət elan edən hökumət kömək üçün beynəlxalq birliyə müraciət etmişdir. Xarici yardım olmasa, region ciddi problemlərlə üzləşəcəkdir.
Regionun təsərrüfatının əsasını heyvandarlıq təşkil edir. Fırtına nəticəsində 100 min baş mal-qaranın tələf olması Puntlendin iqtisadiyyatına hiss olunacaq dərəcədə ziyan vurmuşdur.
Bölmənin digər xəbərləri
