DÜNYA
SOVET ÜRƏK-DAMAR CƏRRAHİYYƏSİNİN BANİSİ NİKOLAY AMOSOV VƏFAT ETMİŞDİR
Sovet ürək-damar cərrahiyyəsinin banisi Nikolay Mixayloviç Amosov Kiyevdə, öz evində dünyasını dəyişmişdir. 89 yaşlı korifey yazda insult keçirmişdi. Bundan əvvəl isə onun ürəyində şuntlama əməliyyatı aparılmışdı və o, kardiostimulyatorla yaşayırdı.
Müharibə dövründə Arxangelsk Tibb İnstitutunu bitirən gənc həkim hərbi-səhra hospitalının aparıcı cərrahı olmuş, döyüş mükafatlarına layiq görülmüşdür. 1955-ci ildə o, ürək cərrahiyyəsi klinikası (1983-cü ildə Ürək-Damar Cərrahiyyəsi İnstitutuna çevrilmişdir) təşkil etmiş və onun dəyişməz rəhbəri olmuşdur.
İTAR-TASS-ın verdiyi xəbərə görə, 9 il əvvəl, 80 illiyi günündə Nikolay Mixayloviç qocalıqda da özünü gümrah hiss etmək üçün bədən tərbiyəsi ilə fəal məşğul olmağı qərara almışdı. Nəticədə “gündə üç min hərəkət” formulu meydana gəlmişdir: gündə 3 saat piyada gəzinti, qantellərlə 2 saat gimnastika və 1 saat qaçış. Əsl alim olan Amosov bütün bunları öz üzərində sınayırdı. Ürəyində cərrahiyyə əməliyyatı aparıldığına görə eksperimenti dayandırdıqda, alim belə qənaətə gəlmişdi ki, o bədən tərbiyəsi ilə çox intensiv məşğul olmuşdur. Buna baxmayaraq, bir ildən sonra məşqlərə yenidən başlamışdı.
Kardiocərrah Amosov təkcə görkəmli həkim kimi deyil, həm də yazıçı kimi məşhurdur. Onun “Zamanların səsləri” kitabı 30-dan çox dilə tərcümə edilmişdir.