Srebrenitsa soyqırımı qurbanına aid olduğu ehtimal edilən sümük qalıqları aşkarlanıb
Sarayevo, 21 sentyabr, AZƏRTAC
Bosniya və Herseqovinanın şərqindəki Srebrenitsa şəhərində 1995-ci ildə törədilən soyqırımı qurbanına - bosniyalı müsəlmana aid olduğu ehtimal edilən sümük qalıqları aşkarlanıb.
AZƏRTAC xəbər verir ki, Bosniya və Herseqovinanın İtkin Şəxslər İnstitutunun məlumatına görə, sümük qalıqları ölkənin şimal-şərqindəki Brçko şəhərindəki evlərin birinin bağçasında tapılıb. Bildirilir ki, mülk sahibi onları böyük ehtimalla 2012-ci ildə gətirərək evinin bağçasında basdıraraq gizlədib. Faktla bağlı araşdırmalara başladılıb. Sümük qalıqları DNT analizi üçün Tuzla şəhərindəki məhkəmə tibbi ekspertiza mərkəzinə təhvil veriləcək.
Qeyd edək ki, 1995-ci ilin iyulunda Srebrenitsa şəhərində və ətraf bölgələrdə bir neçə gün ərzində törədilən soyqırımı 8372 günahsız bosniyalı müsəlmanın qətlə yetirilməsi ilə nəticələnib. Qətliam zamanı mülki insanlar, xüsusilə də qadınlar və uşaqlar serb millətçiləri tərəfindən vəhşicəsinə öldürülüb, hadisə qurbanları kütləvi məzarlıqlarda dəfn olunub.
Potoçari Memorial Qəbiristanlığında indiyədək 6751 nəfər dəfn edilib. Faciədən 28 il keçməsinə baxmayaraq, soyqırımı qurbanlarının 1600-dən çoxunun cəsədi hələ də tapılmayıb.
Nihad Budaqov
AZƏRTAC-ın xüsusi müxbiri
Sarayevo
Bölmənin digər xəbərləri
