“ŞÜBHƏLİ VƏ YA TƏQSİRLƏNDİRİLƏN ŞƏXSLƏRİN HƏBSDƏ SAXLAMA YERLƏRİNDƏ SAXLANILMASI HAQQINDA” QANUN LAYİHƏSİ HAZIRLANMIŞDIR
İnsan hüquqları daimi komissiyasından AZƏRTAC-a bildirmişlər ki, bu qanun Azərbaycan Respublikasının Konstitusiyası və ölkəmizin tərəfdar çıxdığı beynəlxalq müqavilələrlə təsbit edilmiş insan və vətəndaş hüquq və azadlıqlarının daha yüksək səviyyədə təmin olunmasına xidmət edir. Qanun cinayət törətməkdə şübhəli və ya təqsirləndirilən şəxs qismində tutulmuş insanların müvəqqəti saxlanma yerlərində saxlanılması qaydalarını və şəraitini müəyyənləşdirəcək, bu sahədə yaranan münasibətləri tənzimləyəcəkdir. Layihədə əsas anlayışlarla yanaşı, həbsdə saxlanmanın prinsipləri, əsasları, istintaq təcridxanaları, təqsirləndirilən şəxsin istintaq təcridxanasından müvəqqəti saxlama təcridxanasına keçirilməsi, həbsdə saxlanmanın əsas məqsədi, həbsdə saxlama yerlərinin daxili nizam qaydaları və digər müddəalar əksini tapmışdır.
Dörd fəsil, 48 maddədən ibarət olan bu qanun layihəsi təsdiqlənmək üçün Milli Məclisin müzakirəsinə çıxarılmışdır.
