“SÜLH SƏFİRLƏRİ KORPUSU” AZƏRBAYCAN GƏNCLƏRİ İLƏ ƏMƏKDAŞLIĞIN PERSPEKTİVLƏRİNİ MÜZAKİRƏ ETMİŞDİR

15.11.2006 [22:33]
Çap et
A⁺ A^-

AZƏRTAC xəbər verir ki, noyabrın 15-də ölkəmizdə səfərdə olan “Sülh səfirləri korpusu”nun nümayəndələri “İrəli” Ümumrespublika Gənclər Hərəkatının (ÜGH) qərargahında qurumun üzvü olan gənclərlə görüş keçirmişlər.

Tədbirdə Azərbaycan gənclər təşkilatları ilə əməkdaşlığın perspektivləri müzakirə olunmuşdur. Qonaqlara təşkilatın Azərbaycan gəncliyinin səfərbər olunmasında göstərdiyi xidmətlərdən danışılmış, eyni zamanda Ermənistan–Azərbaycan, Dağlıq Qarabağ münaqişəsi və təşkilatın bu istiqamətdə apardığı təbliğat işləri barədə məlumat verilmişdir.

Bakıda olmasından məmnunluğunu bildirən “Sülh səfirləri korpusu”nun baş komissarı Nadejda Çerboxova Azərbaycan gənclərinin bugünkü vəziyyəti ilə tanış olmuş, Dağlıq Qarabağ məsələsinin həlli istiqamətində gəncləri fəal olmağa çağırmışdır. O, eyni zamanda müxtəlif sahələrədə, o cümlədən, regionda sülhün və əmin-amanlığın təminatçısı kimi Azərbaycan gəncləri ilə əməkdaşlıq etməyə ümidvar olduğunu söyləmişdir.

Qonaqlara Dağlıq Qarabağ münaqişəsi haqqında kitablar və bukletlər paylanmışdır.