SUMQAYITIN ÇOXMƏRTƏBƏLİ BİNALARINDA LİFTLƏR İŞƏ SALINDI
Sumqayıtda çoxmərtəbəli binaların liftləri uzun müddət boş dayandıqdan sonra, nəhayət, işə düşmüşdür. Şəhərin yeni rəhbərliyinin fəaliyyətinin ən mühüm istiqamətlərindən biri liftlərin işə salınması məsələsi olmuşdur. Bu məqsədlə xüsusi tədbirlər görülmüş, ehtiyat hissələr əldə etmək üçün vəsait axtarılıb tapılmışdır. Cədvəl üzrə hər həftə 4-5 lift işə salınır. Sumqayıtdakı “Servis-lift” İstehsalat Birliyinin rəisi Cümşüd İmiyev AZƏRTAC-ın müxbirinə bildirmişdir ki, şəhərin təxminən 480 çoxmərtəbəli binasında lift vardır. Lakin onların böyük əksəriyyəti texniki səbəblərə görə10 ildən çoxdur işləmirdi. Şəhər İcra Hakimiyyətinin bilavasitə köməyilə qısa müddətdə Ukrayna, Rusiya, Qazaxıstan və Gürcüstandan komplektləşdiricilər və ehtiyat hissələr alınmış, mütəxəssislər cəlb olunmuş və artıq 75 lift işə salınmışdır. İlin sonunadək çoxmərtəbəli binaların bütün liftlərini işə salmaq nəzərdə tutulmuşdur.
