SURAXANININ SƏNAYE MÜƏSSİSƏLƏRİ CARİ İLİN BİRİNCİ RÜBÜNDƏ 30,6 MİLYON MANATLIQ MƏHSUL İSTEHSAL ETMİŞLƏR
AZƏRTAC xəbər verir ki, Suraxanı Rayon İcra Hakimiyyətində 2008-ci ilin birinci rübündə görülmüş işlər və qarşıda duran vəzifələrə həsr olunmuş yığıncağı keçirilmişdir.
İcra hakimiyyətinin başçısı İlqar Abbasov demişdir ki, bütün ölkədə olduğu kimi, Suraxanı rayonunda da hesabat dövründə xeyli iş görülmüşdür. “Bakı şəhərinin qəsəbələrinin sosial-iqtisadi inkişafının sürətləndirilməsinə dair tədbirlər Proqramı”na əsasən, Suraxanı rayonunun inkişafına 33,9 milyon manat məbləğində vəsaitin xərclənməsi nəzərdə tutulmuş və 52 adda tədbirin 40-nın icrası artıq başa çatdırılmışdır. Bülbülə qəsəbəsindəki gölün qurudulması, Əmircan qəsəbəsində Heydər Əliyev muzey-məktəbinin, Suraxanı Rayon İcra hakimiyyətinin yeni inzibati binasının tikintisi və Heydər Əliyev parkının salınması, eləcə də rayon ərazisindən keçən respublika səviyyəli Zığ-Qala magistral yolunun çəkilişi başa çatmaq üzrədir.
Natiq bildirmişdir ki, rayonun sənaye müəssisələri 2008-ci ilin I rübü ərzində 30,6 milyon manatlıq məhsul istehsal etmişlər. Rayon üzrə orta aylıq əmək haqqı 311 manata, sənayedə çalışanların aylıq əmək haqqı isə 454 manata çatmış, müəssisələrdə və firmalarda iş yerlərinin açılması nəticəsində 399 nəfər işlə təmin olunmuşdur.
Məlumat verilmişdir ki, rayonda enerji daşıyıcılarının haqqının ödənilməsi səviyyəsinin artırılması və yaranmış problemlərin həlli üçün müvafiq tədbirlər görülmüşdür. Birinci rübdə abonentlərə verilən qazın haqqının 33,4 faizi, elektrik enerjisinin dəyərinin isə 62,6 faizi, içməli suyun dəyərinin 42,3 faizi ödənilmişdir. Ərazidə məskunlaşmış 23 min 500-dən artıq qaçqın və məcburi köçkünün mənzil-məişət, sosial problemlərinin həlli istiqamətində müəyyən işlər görülmüşdür.
Bildirilmişdir ki, Nazirlər Kabinetinin “2009-cu ildə əhalinin siyahıyaalınmasına hazırlıq işlərinin görülməsini və onun keçirilməsini təmin edən tədbirlər planı haqqında” qərarının icrası ilə əlaqədar rayonda küçə adlarının və ev nömrələrinin quraşdırılması işi yekunlaşmaqdadır.
Ötən dövr ərzində vətəndaşların sosial müdafiəsinin gücləndirilməsi diqqət mərkəzində saxlanılmış, onların müraciətlərinə vaxtında baxılıb müvafiq tədbir görülmüşdür. Yeri gəlmişkən, rayon İcra hakimiyyətinə 1076 ərizə, şikayət və xidməti sənəd daxil olmuşdur.
İ.Abbasov sonda onu da bildirmişdir ki, ümummilli liderimiz Heydər Əliyevin 85 illik yubileyini təntənə ilə keçirmək məqsədi ilə rayon icra hakimiyyəti xüsusi proqram təsdiq etmişdir. Proqrama uyğun olaraq, rayonda yubiley tədbirləri, o cümlədən məktəblilər arasında müsabiqələr, idman yarışları təşkil olunacaqdır.
Hesabat yığıncağında Prezidentin İcra Aparatının məsul işçisi Tağı Tağıyev, Milli Məclisin deputatı Əhməd Vəliyev iştirak etmişlər.
Bölmənin digər xəbərləri
